Govt Complex tih thin, Ainawn Venga sawrkar quarters luahtu mi 160 vel chu an awmna hmun siamthat a nih dawn avangin sawrkarin ni 60 chhunga chhuahsan turin a hriattir.
2023 June 18-a Council of Ministers thukhawm chuan Ainawn Veng (Govt Complex tia hriat thin) a sawrkar building/ quarters hi chhiatrupna thleng thei pumpelh na’n building-te tih ruah a, thiah nghal nise, tiin thutlukna a siam a. He thuchhuak bawhzui hian June 22 khan General Administration Department (GAD) chuan Ainawn Venga sawrkar quarters type I, II, III leh IV luahtu chhungkaw 100 chuang chu ni 60 chhunga an chenna in chhuahsan turin ‘vacation order’ a chhuah a ni.
MPCC chuan thuchhuah siamin, GAD thuchhuak hian chhungkaw tam tak tana manganna a thlen avangin ngaihtuah nawn leh turin sawrkar a duh a. Quarter luahtute dinhmun hrerengin, tun aia awmze nei zawka hma la turin a ngen tih a sawi.
Sawrkar lehkha atanga a lan danin, Ainawn Venga sawrkar quarters luah mektute hi chhungkaw 161 vel an ni a. Hmundangah chenna in an neih loh avangin an theih ang angin an sum leh pai sengin an quarters luah hi an siamtha (repair) ve thin a. Sawrkar phalna thlapa luahtute chuan thlatin sawrkarah House Rent Allowance an chawi thin tih a sawi a ni.
‘Mizoram sawrkar thupek khauh tak avang hian Ainawn Venga sawrkar quarters luahtu chhungkaw 100 chuang chuan ni 60 chhung ngeiin chenna tur hmun dang an zawn a ngai dawn a. Kum tam tak chhung an lo chen tawhna veng atanga hnawhchhuah an ni mai tur hi an tan a manganthlak takmeuh a. Veng dangah pawh in luah tur a van bakah an hlawh atanga an luah phak tawk in hmuh harsa tak tur a ni a. Chhungkaw tam tak chu sawrkar thuchhuak avang hian lungngaiin an kun mek a ni,’ a ti.
Heng sawrkar quarters-te hi a theih ang anga cheitha turin Congress party chuan MNF sawrkar a phut tih sawiin, ‘Chenna atana a him lo tih chhuanlama a luahtute dinhmun hriatthiam pui duh loa chhuahtir tum rum rum hi a nunrawn thlak a. Chenna atan a him lo a nih pawhin, a tahtawlin siamthat hna sawrkar sum neih dan milin an thawk mai turah kan ngai,’ a ti. Sakthat a nih pawhin sak zawh hunah tuna luahtuten anmahni puala in an la nei lo a nih chuan an luah leh ngei theihna’n sawrkarin intiamkamna siam se an duh tih a sawi bawk.
Complex amite chhuak turin ti Heti rum rum lo hi nise – MPCC
Get real time updates directly on you device, subscribe now.