District hrang hrangah Ruihhlo Do Ni hmang

Khawvel puma ruihhlo hmansual leh tawlhruk dona ni – International Day Against Drugs Abuse and Illicit Trafficking 2023 chu Thawhtanni khan hmun dang rualin Mizoram district hrang hrangah pawh hman a ni.
Lungleiah chuan Health & Family Welfare minister Dr R Lalthangliana’n a hmanpui a. Kum 1984 atanga vawiin thlengin ruihhlo avanga Mizorama nunna chan 1776 an awm tawh a, kan thih belh mek zel bawk tiin, heng hi tiziaawm turin theihtawp chhuah mek a ni tih a sawi. Lunglei Police department-in kum thum – 2021, 2022, 2023 chhungin ruihhlo an man chu Rs. 28,89,558,040 a ni tih sawiin, “Kan nunna hi ruihhlo hian nasa takin a pawt tawi a, ramtuileiloa mihringte siamtu a ni bawk. Ruihhlo tirem turin theihtawp chhuahin nasa takin do tlang zel ang u,” a ti.
Champhaiah Law & Judicial minister TJ Lalnuntluanga hoin hman a ni a. Ram leh state thenawma ruihhlo nasa taka buaipuitute leh sum ngainate avangin kan ramah ruihhlo a lut a, ramin kan tuar ta tih a sawi. Ram dinhmun siamtha turin sumdawnna thianghlim lo thlak a ngaih thu sawiin, border trade kalpui mekah hemi hrula ruihhlo tawlhruk thinte do kawngah ngaihtuahna sen tlan a pawimawh tih a sawi a ni. Champhai Police-ten October 2022 atanga February 2023 thlenga ruihhlo an man, heroin kg 12.5, cheng nuai 6175 man hu; Crystal Methamphetamine kg.20, cheng nuai 6000 man hu leh ruihhlo dang, a vaiin tualchhung hralhnaa Rs. 3,78,26,240 man hu halral a ni a. District Level Disposal Committee-in dan anga a tihral theih loh heroin kg 12.32 chu High Level Disposal Committee Aizawlah halral tura thawn a ni bawk.
Mamitah chuan District Level Narco Coordination Centre buatsaihin an chairman, district bawrhsap VL Remliana hoa hman a ni a. An district chhunga ruihhlo mankhawm – heroin kg. 1.320, tualchhunga hralhna anga Rs. 28,35,260 hu chu District Hospital incinerator-ah halral a ni.
Lawngtlaiah chuan zingkarah Lawngtlai District Police huaihawtin Areopagy-ah SDO (Sadar) Daniel Sailo hoin an hmang a ni.