Concert en zo fan pakhat a thih hnuah Taylor Swift-i’n Rio de Janeiro concert a sawn

Taylor Swift chuan Eras Tour a neih kal zelah Brazil a lut ta a, November ni 17 zan khan concert neiin, hemi zana a concert chhimtu pakhat chu concert zawh hnu lawkah a thi a, November ni 18-a Swift concert neih leh tur chu last-minute-ah sawn a nih thu puangin, November ni 20-ah an sawn leh thut a ni.
Taylor Swift chuan concert hun sawn a nih thu hi a lehkhaa a kutziak ngei thlalak Instagram-ah post-in, “Stadium chhunga dressing room atanga ziak ka ni. Rio-a khawlum lutuk avangin zanin hun hman tur sawn zai kan rel ta mai. Ka fan-te, performer leh crew te himna hi kan ngaipawimawh hmasa ber zel tur a ni,” a ti.
Zirtawpni zan khan Swift hian social media-ah a concert chhimtu, a fan, kum 23 mi, Ana Clara Benevides Machado thih thuin a rilru a tihrehawm hle tih puangin, he nula hi Rio-a Eras Tour concert hmasa ber a en zawh hnu lawmah a nawm loh thu sawiin, paramedic-ten an bawihsawm hnuah damdawi in panpui a ni a, a thih thu puan a ni ta a ni. Machado thih chhan tak hi puan a la ni lo.
Swift chuan, “He thu ka ziah a tul ta mai hi ka awih thei lo zawk hial a ni, thinlung kehsawm chungin zanin show show lan neih hma hian fan pakhat kan chan tih puan a tul ta si a. Hrehawm ka tihzia hi sawi ngaihna a awm lo. Chanchin ka hre tam lo a, mahse, hmeichhe duhawm vanglai tak a ni tih ka hria a ni. Hei hi stage-ah ka sawi chhuak thei dawn lo, a chhan chu sawi ka tum ringawt pawhin ka hnuk a ulh zel. Tunah hian he channa hian lairil a fan a, a chhungte leh thiante ka tawrhpui tak zet. Brazil-a tour nei tura thutlukna kan siam lai khan hetiang thil hi suangtuahna ram pawhin a thlen phak loh a ni,” a ti bawk.
Brazil-ah hian khua a lum hle a, Rio-ah hian heat wave thawkin, khawlum lam pawh 102.4 degree Fahrenheit (39.1 degree Celcius) a kai niin Associated Press chuan an tarlang. Hetiang khawpa khua a lum chung hian concert chhimtu thenkhat chuan stadium chhungah tui ken luh phalsak an nih loh thu an sawi.
Rio’s Estádio Olímpico Nilton Santos-a Eras Tour concert a neih hmasak bernaah pawh Swift hian show a kal laklawh laiin a performance titawpin fans thenkhat tui an mamawh tih lantir te tui a dil sak nghe nghe a, “Feet 30,35 40 vela hlaah sawn mi thenkhat tui mamawh an awm. Chuvangin a mawhphurtu lam khan lo pe ngei rawh u. An awmna in hre thei tih signal min rawn pe thei ang em?” a ti.