Cong president thusawi chhanglet

Cong president thusawi chhanglet
Congress president Lal Thanzara’n buhfai supply tura sawrkarin a thlanin dan dik loin thil a ti niin a sawi a. Supply minister chuan beihna dang hriat loh avanga thudik hre chung sia sawi ve mai maiah a puh thung.
MPCC president hian March 20-a Congress Bhavan-a thu a sawinaah, tun sawrkarin buhfai supply turin tender chhang hniam ber pawh ni lo LZ Juice a thlang a. An buhfai supply dan an enzuinaah thil fel lo tam tak a awm tih an hmuchhuak niin a sawi.
“Truck ke 16 neiin buhfai bag 700 an phurh theih laiin, LZ Juice hian buhfai bag 16 chauhte an phurh tir a. Challan-a a lan danin buhfai phurhnan car pawh an hmang a ni awm a, an car erawh a chak tha hle aniang, buhfai bag 700 an lo phurh tir niin a lang. JCB pawhin buhfai bag 720 phur angin chhinchhiah a ni bawk,’ a ti a. Mipui nghawng buhfai kaihhnawihah hian corruption awm thei thil a nih avangin chumi vengtu tura ZPM-in a neih Val Upa Council hrilhhriat an thaa a rin thu a sawi a ni.
He a thusawi hi FCS&CA minister B Lalchhanzova chuan Inrinnia Zemabawk-a ZPM party tana street campaign neihah chhangletin, party ral mai tur Congress president-in beihna dang hre si loin sawrkar lai beihna atana buhfai phurhna atana two wheeler hmang anga a sawi chu, a dik lo tih hrereng chunga sawi thinah puh letin, “Challan-ah motor number an ziak a, number an ziak sual palh tihte kan hmuchhuak daih tawh a, buhfai bothlau awm reng reng lo kha beihna dang awm si loin a sawi ve mai a ni,” a ti. Congress leh MNF chu kum 37 hun pek an ni tawh a, an nihna leh mizia mipuiin an hre tawh a, chawlh an pek tawhte an ni tih a sawi.
Revenue minister ni bawk B Lalchhanzova chuan, Zemabawk West-in hmun (plot) 100 chuang chu sawrkarin a chingfel ta tih a sawi a. “Chief minister zarah theih loh nia ngaih kha kan chingfel ta a. CM hian thil tha nia kan hriat hmalaknaah a dang ve ngai lo,’ tiin, sawrkar hmasain kum 30-40 chhung an lo chinfel sak duh lo niin a sawi.
“MNF kum 17 sawrkar leh ZPM kum 2 sawrkar hi khaikhin rawh u. Sawrkar hmasa khan Chêkbawk a buai thei ang berin an chingfel a. Mi 50 lengah 150 vel an thun. Fact Finding Team kan din a, 85% vel kan chingfel der tawh. Enliam mai mai ila chatuan ram buai a ni dawn. Maumual pawh MNF chinfel theih loh kha kum hnih hmain an tifel tih a sawi bawk.