Trump leh Putin inbia, Ukraine indo tihtawp tum

Trump leh Putin inbia, Ukraine indo tihtawp tum
US President Donald Trump-a chuan Vladimir Putin-a nen phone-in ‘rei tak leh hlawk taka’ an inbiak thu leh hruaitu pahnihte hian Ukraine-a indona kal mek titawp tura inbiak an inpeih tih a sawi.
Truth Social-ah Trump-a chuan Russian president nen hian ‘an team ve ve a hma thei anga inbiak’ an inbeih a, an khawpui tlawh turin an insawm tawn ve ve tih a tar lang.
A hnuah Ukrainian President Volodymyr Zelensky chuan Trump-a hi a biak thu leh ‘muanna tlo leh rei tak daih’ chungchang a sawipui tih a sawi ve bawk.
Indona hi tihtawp a nih pawhin Trump-a leh a defence secretary te chuan Ukraine hian Nato a zawm loh an ring a, hei hi Kyiv tan chuan thil pawi tak a ni dawn.
Zelensky-a chuan Vice-President JD Vance leh Secretary of State Marco Rubio te chu Zirtawpnia Munich-a Ukraine chungchang sawihonaah a be dawn tih a sawi.
Trump hian social media-ah, “He indona, nasa tak leh tul lo tak, thihna leh chhiatna tam tak thlen hi tihtawp a tul a. Pathianin Russia leh Ukraine mipui malsawm rawh se!” a ti.
Putin-a nena an inbiak ni tur erawh a sawi lo va; mahse, a hnua White House-a thuthar lakhawmtute a kawmnaah, “Saudi Arabia-ah kan inkawm ang,” a ti thung.
Kremlin thupuangtu, Dmitry Peskov-a pawhin Putin-a hian Trump-a ngaihdan a tawmpui a, thawhho hun a thleng nia a hriat thu a sawi.
Phone-ah Putin leh Trump-a hi darkar khat leh a chanve dawn an inbia a, Russian president hian Moscow tlawh ngei turin a sawm niin Peskov-a chuan a sawi.
Trump-a chuan White House-a thuthar lakhawmtute a kawmnaah Ukraine chu kum 2014 hma lama an ramri neih saah an kir leh ang tih a sawi a; mahse, BBC-in ‘an ram an chang leh dawn em’ tih a zawhna erawh a chhang lo.
President hian Nilainia Nato summit-a tel, Defence Secretary Pete Hegseth-a nen Ukraine chuan tangrual hi a zawm loh tha an ti ve ve niin a sawi bawk.
Zelensky-a chuan Trump-a nen thil hrang hrang ‘tha leh kimchang takin’ an sawi dun tih a sawi a, Kyiv tlawhtu US Treasury Secretary Scott Bessent nen pawh an inkawm tih a sawi.
“Ukraine aia muanna duh tumah an awm bik lo vang. US nen hian Russian-te min beihna titawpa muanna tlo leh rei daih thei turin kan che ang,” a ti.
Ukrainian hruaitu chuan, “Inbiak zel leh a taka inhmuh pawh kan tum a ni,” a ti bawk.”
US leh Ukrainian hruaitute hi darkar khat vel lai an inbia niin AFP news agency chuan a tar lang.
The Guardian-in Thawhlehnia Zelensky-a an kawmna a tihchhuahah chuan Russian-ten Ukraine ram an luah chu Ukrainian-te luah Russia khawthlang lama Kursk region nen muanna inremna atan inthleng a phal thu a sawi.
Putin-a thupuangtu, Peskov-a erawh chuan he thil hi ‘theih loh’ a ti thung.
Ukraine-ah hian kum 2014-a Russian president tantu paih thlak hnuah Moscow chuan Black Sea peninsula-a Crimea luahin Russian inlak hran duh pawlte a pui a, Ukraine khawchhak lamah thisen tam tak a luah phah.
He thil kal zel avang hian kum thum kal ta atang khan Russia chuan Ukraine a rûn zui.
Moscow hian an khawpui, Kyiv luah a tum chu dan a ni a, Russian sipaite hian Ukraine khawchhak leh chhim lama ram hmun ngaa hmun hnih vel a la hman a, an ram pum chu thlawhna atangin a kap bawk.
Ukraine hian a chhang let a, lei lamah Russia khawthlang lam, Kursk region-ah a nawr tawm ve nasa hle.
Indona avanga thi hi Russian leh Ukrainian sorkarten an thup avangin a zat chiah hriat a har hle a; mahse, mi sang tam tak, a tam zawk sipai thin leh hliam an awm tawh a. Ukrainian civil mi maktaduai chuang an raltlan tawh bawk.