Congress future hi keimahah a awm – Lalsawta

Sawrkar ve hrim hrim tumtuten a mimal takin amah an sawi chhe dawn a, mahse a hlau loa, Congress future chu amahah a awm tih Congress president Lalsawta chuan a sawi.
Zirtawpnia Congress Bhavan-a political session neihah Lalsawta chuan sawrkar ve hrim hrim tumin amah chu a mimal takin an rawn sawichhe dawn a, mahse a hlau loa, heng mite hi sawichhiat let ve tur a ni lo tih sawiin, “Tuna Congress future hi keimahah a awm. MPCC president Lalsawta hi hlemhletna ah min bei a nih chuan dawt a ni ang, an finfiah theilo a nih chuan a man hi a to khawp ang. Ka tum chu ram leh hnam tan a ni. Sawrkar duh vanga rilru fim put theih loh hi ram tan bawk a hlauhawm,” a ti.
Ram, hnam leh sakhua tan kan rinawm a ngai a, rinawmna tel lo chuan engkim a ho vek, tia sawiin, India Constitution siamtute pawhin an dah pawimawh ber chu rinawmna a ni tih a sawi. Hei vang hian mipui thlanchhuahte pawh rinawmna thutiam an lak tur duangin, hlauhna leh duhsak bik nei loin hmangaihna nen huatna tel loin mi tupawh enkawl turin thutiam lak a ni tih a sawi.
Pathianin Congress party kawng a hruai a, mi tha tak tak leh rinawm a pe zel tih Congress hruaitu hian a sawi a. June thla chhungin politics khelh fuh tum lo, tih dik leh siamthat tumte inlawmluhna runpui an nei dawn tih a sawi a ni.