Congress hi kan thar tawh – Lalsawta

Inthlanpuiah an party chuan sum thiltihtheihna an hmang ve dawn loa, Congress thar an ni tawh tih an president Lalsawta chuan a sawi.
Zirtawpnia Bethlehem Vengthlang Congress Group Committee campaign khuhhawn a hmanpuinaah Lalsawta chuan politics ram hluiah thenkhat chu kan la cheng a, sum ngah leh sum beiseituten ram rorelna an luah hi a ngaingam loa, Congress chuan sum thiltihtheihna an hmang ve dawn loa, Congress thar an ni tawh tih a sawi.
Party thenkhat chuan hmanrua atan ‘sum’ hman an tum a, an ni chuan an nei ve lo tih a sawi. “He inthlan hi sum hmanga indona a nih kan phal tur a ni loa, sum hmachhuantute chu lo hnawl rawh u,” a ti.
Mizote chu hnam taima, hnam rintlak kan ni thin a. Vawiinah chuan kan hnam lungphum a nghing mek tih a sawi. “Kan sakhua a him loa, kan ram ngeiah min nekcheptu an awm a. Missionary-te pawh koh haw an ngaih hun a la thleng ang. Chuvangin kan Mizo-na humhim tur leh kan sakhuana humhim tur Congress party hi mipuiin min sawrkar tir leh a ngai a ni,” Lalsawta hian a ti.