Congress party chuan Nilaini khan Congress Bhavan Aizawlah sawrkar tha (Good Governance) chungchangah seminar an buatsaih a; Pachhunga University College faculty Lalthlamuana Ralte chu resource person a ni.
-- Advertisement --
Resource person chuan kum 15 kalta atang khan sawrkar inrelbawlna tha nei turin hma an lo lak ve thin thu a sawi a. “Sawrkar tha loah hausak a zahthlak a, sawrkar thaah retheih a zahthlak. Sawrkar inrelbawlna tha, ‘Good Governance’ hi suangtuahna leh mumang a ni lo. A taka tih leh thlen tir theih a ni,” a ti.
Sawrkar tha nei tura tih tur hmasa chu inthlan kan hmachhawn danah a ni, tiin, “Inthlanah danglamna a tha zawnga kan lantir a, kan thlentir chuan sawrkar tha, inrelbawlna tha kan nei thei ang. Heng harsatna sukiang turin ‘political will’ neih a pawimawh,” a ti.
Sawrkar tha nei turin mawhphurhna la ngam hruaitu kan mamawh thu leh chu chu Mizo zia nen pawh a inmil a, pipute atang tawha kan kalphung a ni tih Lalthlamuana Ralte hian a sawi a. Lansarh hunah ni lo, a harsat lai pawha mawhphurhna la ngam hruaitu kan mamawh, tih sawiin, inrelbawlna tha nei turin sawrkar langtlang neih a tul tih a sawi bawk.
“Sawrkar thaah chuan mipuiin sawrkar hmalakna information an hre tur a ni a. Sawrkar hi langtlang se, inrelbawlna tha chu kan nei thei ang,” a ti.
Mipui mamawh anga zela chhuanlam siam loa, che chhuak thei chu sawrkar inrelbawlna thaah chuan a awm tur a ni tih a sawi a. Duhsak leh tih bik nei lo, rualkhai taka mipui hruaitu, mitin tana luangchhluak thei leh intluktlanna sawrkar kan mamawh tih a sawi a ni.
Dan ang taka kal ngam sawrkar kan mamawh tih resource person hian a sawi bawk a. “Pawi nasa taka khawihtute zalen taka khawlaia an leng leh mai mai kan hmu fo. Hei hi a dik loa, dan bawhchhetute hian hremna an hmachhawn tur a ni,” a ti.