Congress te chuan Prime Minister Narendra Modi-an Congress president Sonia Gandhi chungchang a sawi duh dan chu na taka sawiselin Modi chu prime minister office zahawmna pawh humhim zo lovah an puh a ni.
Modi hian Thawhtanni khan Belagavi, Karnataka-a thusawina a neihah Congress te chu an Presdient Mallikarjun Kharge ‘hmusit leh zah lo’ ah a puh a.
Modi chuan, “Khua a lum em em a, mi tin an dinga khawlumin a uap hneh hle tih a hriat a. (Congress plenary session a sawina) mahse Kharge chu tumahin nihliap zawn nachang pawh an hre lo. Nihliap awm chu Kharge bula ding tan zawk a ni a. Hei hian Congress president atana Kharge ruat chu a hming mai mai a nihzia pholanna niin Congress chu chhungkuain remote-controlled a an thunun tih a lang a ni” tiin a sawi a. PM hian Sonia Gandhi nihliap zawn chunga a ding a sawina ani.
Modi thusawi hi Congress thupuangtu Supriya Shrinate chuan chhang letin, Prime Minister hian Kharge hmusit zawnga thu a sawi apiang hian amah thlangtu electorate te a zah lohzia a pholang zel a. Kharge hi kum sawm nga chhung zet chu State Assembly, Lok Sabha leh Rajya Sabha-a mipuite thlan a ni tawh, a ti a.
“Sonia Gandhi hi damlo chakvak lo a ni a, ni sa hnuaia awm lo tura tih a ni chungin party a ngaihtuah avanga tel hram hram zawk a ni. Sonia hmusit zawnga PM Modi-an thu sawi a neih hian amah Sonia chauh ni lo he rama hmeichhia tin te a hmusit a ni,” tiin a sawi bawk.
PM hian prime minster office zahawmna pawh a humhim zawh lohzia a pholang zel zawk a ni, tiin Shrinate chuan a sawi bawk a.
Hei mai bakah hian BJP te chuan an hruaitu kum 75 chin tawh te chu an nawr chhuak zel a ti bawk a. “PM Modi an L.K. Advani leh Murli Manohar Joshi te takngial pawh amah chibai buk tura an din pawha haidera en pawh en lova a kal kan dan video te pawh kan hmu a ni,” tiin a sawi bawk.
Congress-in Sonia thu-ah PM Modi chhang let
Get real time updates directly on you device, subscribe now.
Prev Post