Congress-in tling thar lawmpui

Congress-in tling thar lawmpui
Congress party chuan Sinlung Hills Council member thlan thar zinga Congress ticket-a tling Lalrawngbawla, Khawlian bial lawmpuina chu Zirtawpni khan Congress Bhavan-ah an hmang.
MPCC president Lal Thanzara chuan Sinlung Hills Council inthlan atang hian Congress an inlungrualin an inthurual a, nasa takin hma an sawn tih a lanchian thu sawiin, Council member pakhat chauh an tling chungin, SHC pumpuia vote tla zawng zawngah sawrkar ta MNF chu vote 185 chiahin an pha loa, sawkar lai ZPM-in an ni aiin vote 403-in an hmu tlem zawk tih a sawi.
“Sinlung Hills Council inthlanah hian boruak kan han en a, kan chak theih mai dawn hi, kan ti a; amaherawhchu a tir atangin hlauh kan nei a, a dawn zan velah sum leh pai a rawn leng anga, chu chu kan do zo loang tih kan hlau a ni. Kan sawi ang ngeiin sum leh pai mai niloin khilai hmunah petrol pump an rawn hawng ta emaw tih mai turin party dangten hma an la a. Chutih laiin kan candidate-te chuan sum leh pai hman tur an nei ve lo,” Lal Thanzara hian a ti.