Congress kum 10 thawh leh tun sawrkar thawh inbuktawk – MNF Thalai V/P

Congress sawrkarin kum 10 chhunga a thawh leh tuna sawrkar lai hnathawh chu a inbuktawk tih MNF Thalai vice president Zodinpuia chuan a sawi.
Thawhlehnia MNF Thalai Hqrs thutkhawmah Zodinpuia chuan Mizoram politics boruak inlumlet dan thlirin MNF-in sawrkarna a chan chhunzawm leh dawn tih a chian thu a sawi a. Congress leh ZPM chu an hruaitute inkar a nget nasat avangin reilotea tlu mai thei dinhmunah an ding mek niin a sawi.
MNF sawrkarin Covid-19 vangin kum thum 3 tha vel chauh ram hmasawnna tura hnathawhna hun a nei chungin, chief minister Pu Zoramthanga kaihhruaina hnuaia MNF sawrkar hmalakna hi Congress sawrkarin kum 10 chhunga hmasawnna hna thawh nen a inbuktawk hial tawh tih a sawi a ni.
Eiruk leh hlemhletna dotu tur Lok Ayukta chu Congress kum 10 sawrkar chhungin a din ngam lo tih MNF Thalai vice president hian sawiin, “Kum 2016- 2017 ah Lok Ayukta dinna’n cheng nuai 159.34 dah mah se, din turin hma an la ngam loa, kum 2017- 2018 ah pawh Lok Ayukta dinna’n nuai 159.34 an dah leh a, heti chung hian an din ngam chuang lo. MNF chuan a sawrkar tuk maiah Lok Ayukta hi a din nghal a ni,” a ti.
Politics zirtirna dik lo ruihchilh tamna hmunah khawtlang leh kohhran inlungrualna a chhe thin tih sawiin, MNF chu Mizo nationalism maicham chunga hlan thianghlim tawh, Mizo hnam leh kan Kristianna humhim tura din a nih avangin political party dangte aiin MNF lakah Mizo mipui thikthu a chhe bik hle tih a sawi bawk.