Congress ten Rijiju thusawi an chhang let nâ

Union Law Minister Kiren Rijiju chuan Congress president lui Rahul Gandhi-an tun hnaia London-a a thusawi te chu sawiselin Gandhi chu ‘India inlungrualna atana mi hlauhawm’ tia sawi avangin Congress leader dangte nen an inbakkaih zui nasa hle.
Rijiju chuan Kerala-a Wayanad constitutency MP Gandhi chu ‘Pappu’ tiin a sawi bawk a, Pappu tih hi Hindi thumal niin IQ nei tlem te sawina leh nuihsawhna a ni.
Congress communication chief Jairam Ramesh chuan Law Minister chu ‘zahpuiawm’ tiin a sawi ve thung a.
A bul tanna tak chu Rijju-an tun hnaia London-a Gandhi-an thusawina a neiha Muslims, Christians, Sikhs leh sakhaw dang vuantu Indian-te vek an awm chungin Prime Minister Narendra Modi chuan ‘second class khua leh tui’ angin a ngai a ni tih a sawina 26 seconds video clip social media-a a post atanga intan a ni a.
Law Minister chuan tweet zuiin, “Congress Prince tia mahni invuah chawp hian ramri a pel ta a ni. He pa hi India inlungrualna atana mi hlauhawm a ni a. India then darh tuma fuihpawrhin chet a la a. India Prime Minister tawha lar leh ngainat hlawh ber Narendra Modi mantra chu Ek Bharat Shreshtha Bharat a ni” tiin a post zui a ni.
“India mipuite chuan Rahul Gandhi hi Pappu a nih an hre vek a, mahse, foreigner te chuan Pappu a nih an hre lo va. A thusawi mawlthlak tak hi chhan let a ngai lo chungin a buaithlakna ber zawk chu a anti-India thusawi hi anti-India forces ten India hmel tihbalh nan an hmang thei a ni,” tiin a sawi.
Law Minister thusawi hi chhang letin Congress leader leh Lok Sabha member Manickam Tagore chuan Prime Minister cabinet-ah Christian emaw Muslim Cabinet Minister pakhat tal an awm em an hming lam chhuak teh se tiin a cho thung a.
“Sabka ka Saath hi slogan mai chauh a ni e, Rijiju” tiin Tagore chuan a tweet zui a. “Mawl taka thil sawi hi sim teh. India Law Mnister i ni a, chu mi mil takin awm ve deuh teh,” a ti zui bawk.
A tweet dangah Rijiju chuan Gandhi hming sawi lang si lovin, “Product pangngai tho si tlangzarh danah chintawk awm se. London-a tlangzarh nawna zawrh leh hian India-a gang pangngai tho te kalpui tho a ni,” tiin a sawi bawk.
Congress thupuangtu Supriya Shrinate chuan Rijij chu troll tia sawiin Ramesh thung chuan, “Minister zahpuiawm,” a ti thung.