CONMEBOL Copa America 2024: Brazil barakhaihtu Uruguay

Las Vegas khawpuia Allegiant Stadium-ah Pathianni zing khan rin kai lo zawk Uruguay chuan hun pangngaiah goal chhuah loin Brazil an dangbet thei a, penalty shootout lamah vannei zuiin 4-2 hnehna nen CONMEBOL Copa America 2024 semi-final an lut a, quarter-final inkhel danga 5-0 tehrenga Panama sawptu Colombia nen final luh an inchuh ang.
Semi-final lehlamah champion lai Argentina leh north American team Canada an intum ve thung dawn a nih kha.
Penalty petah hian Uruguay tana penchhuak Manuel Ugarte chungah Uruguay mipui an innghat a, a pet goal chuan Brazil hnehin semi-final an lut dawn a, a goal loh chuan Brazil-in beiseina an nei leh thei ang.
Pressure sang tak hnuaiah Ugarte chuan a han chhuih a, Liverpool goalkeeper Alisson-a dan zawh loh goal khungin Brazil an tla!
Shootout-ah hian Uruguay goalkeeper Sergio Rochet chuan Eder Militao pet dangin, Brazil tana penchhuak dang Douglas Luiz chuan goal ban a petper bawk.
Hun pangngaiah team pahnih hian goal thun theihna hun remchang siamchhuah an harsat ve ve a; tan khawh nat zual hun lai minute 74-a Nahitan Nandez hnawhchhuah a ni chungin Marcelo Bielsa team Uruguay-in hun tawp thlengin an lama goal lut tur an dang tluan thei a, penalty petah an vannei zui leh ta zel a ni.
Inkhelh banah Uruguay keeper Sergio chuan team khawng lutuk lakah game harsa leh hautak zet an paltlang tih sawi chungin chuti ang team laka hun tawp hnaih lama a tlem zawk la nih phei chu a manganthlak zual niin a sawi a, chuti chunga player naupang tak tak rualin rilru paukhauh an pu thei kha fakawm a tih thu leh hnehna chu an ramin a phu tih a sawi a, an phur em em tih sawi chungin tunah chuan thui zawk thlen an inbeisei ngam tih a tarlang tel.
Kha match-ah khan foul tum 41 tehreng ham niin, team pahnihin mar nal zaihin an khel thei lo ve ve.
Liverpool striker Darwin Nunez chuan Uruguay ‘chance’ tha ber a hloh a, hnai tak atangin goal kham chungah a thlawhchhuak.
Brazil lamin rang takin counter-attack an chhunzawm ve nghal a, mahse, keeper Rochet chuan Raphinha goal tur chu a dansak.
Minute 74-ah na zeta Rodrygo a tihtluk avangin Nandez chu yellow card hmanga thunun a ni zet a, video assistant referee-in thil thlen dan a enfiah hnuah referee chuan a thutlukna siam tidanglamin red card-ah a let ta zawk a, Brazilian fans an phur thar.
A tlem zawk an nih atanga minute 90 a zawh thlengin Uruguay lam hian tlarhnung venhim chiah an buaipui ta a, hun pangngaiah goal an chhuah lo tluan a, extra time khel loin penalty an pet a, hnehna nen last four an chuangkai ta a ni.
Pathianni zing quarter-final inkhel dangah James Rodriguez chuan goal khat thunin assist vawihnih a siamchhuak a, State Farm Stadium, Glendale, Arizona-ah singa faiin Panama lakah Colombia a chakpui.
James-a corner chhuih atangin Jhon Cordoba chuan Colombia goal hmahruai khungin, a hnuah Real Madrid leh Everton forward hlui James Rodriguez hian penalty atangin a khung belh.
Chawlhlawk dawna Rodriguez-a free-kick chhuih rang zet chhawrin Liverpool star Luis Diaz chuan sithum faia an hmahruaina a thawh ve leh.
Colombia goal hnih dang hi Richard Rios-a long-range strike leh Miguel Borja penalty pet atanga lut a ni.
Los Cafeteros hi Copa America hnuhnung vawiliah tum thum semi-final an lut tling ta a; February 2022-a sikhat faia Argentina an hneh loh hnu khan tlawm an la nei leh ta miah lo a, match 27 chhung zet tlawm an pumpelh tling ta a ni.
Nilaini semi-final hmasa zawkah defending champion Argentina leh Canada-te MetLife Stadium, New Jersey-ah an intum ang a; Charlotte, North Carolina lamah Uruguay leh Colombia an inhmachhawn ve thung ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More