CONMEBOL Copa America 2024: Uruguay hneha Argentina ep tur Colombia
Nimin zingah Copa America semi-final match hnuhnung zawk khelh niin, hun chanve chhung ngawt player 10-a khel chungin Uruguay lakah sikhat faiim Colombia an chak a, Thawhtanni zing final-ah champion lai Argentina an hmachhawn ang.
Charlotte khaw last four match-a goal awmchhun leh Colombia chakna goal ni zui ta hi first half-a Jefferson Lerma tauhluh niin, minute 39-a an corner hmuh chu Lerma hian Uruguay defender-te aia sanga zuangin goalkeeper Sergio Rochet ven goal-ah a thun a; half time dawn tepah Colombian right back Daniel Munoz chuan at a so a, ball nun loh laiin Manuel Ugarte awm bawrah a nghawk a, a tumhnihna atan yellow card hmuin hnawhchhuah a ni a, Colombian team leh an fans tan ngui rawihna tham a tling awm e.
First half chhung hian Uruguay tan Darwin Nunez chuan goal thun theihna hun remchang vawi duai lo hmu mah se a hlawhtling zo lo a; a tam zawk an nih hnu second half hun pumah pawh Uruguay lam hian inkhel thunun nghet engang mah se an siphurh an sut thei lo tluanchhuak a; a teuh berte zinga mi veteran striker Luis Suarez chuan goal ban tihperin, huai sen taka dingtlang Colombia lamin an ram football chanchina hnehna lian leh hmingthang an sualchhuak a, Messi & Co. kuta title awm mek chhuhsak turin vawikhat khelmual luh an la hmabak.
Uruguay leh Canada-in third-place play-off an khel ang.
Messi record khumtu
James Rodriguez
Nimin zing semi-final match-a Jefferson Lerma goal tur chhawpsaktu Colombia captain James Rodriguez khan Copa America-a assist nei hnem ber ni reng thin Argentina captain Lionel Messi record vawinga chu khumin record thar a siam.
Kha game-a ‘player of the match’ atana thlan Rodriguez kha tunah kum 32 mi ni ve tawhin, Real Madrid a chhuahsan hnuah hriat zui a hlawh ta vak lo a, mahse, Copa America lamah ropui taka ball a tlanpui theihna (magical run) kha a pholang leh a, tournament kal laiah he attacking midfielder hian assist vawiruk a siamchhuak tling ta a, Argentinian great-in kum 2021 trophy an lak tuma assist vawinga a neih kha khumin, Thawhtanni zing hian Albiceleste kuta title awm mek chhuhsak turin hun remchang a nei zui leh mek bawk.
Rodriguez hian Colombia group game hmasabera Paraguay an sut tum khan assist vawihnih nei nghal thawtin, Costa Rica lakah vawikhat leh quarter-final match-a Panama an paltlang tumin vawihnih assist a siamchhuak leh a, Uruguay lakah ni lehin, Messi record chhuhsaktu nih hi eng subject-ah mah a nep thei lo ang!
Buainaa inhnamhnawih Nunez
Ningani zinga an chak loh hnu khan Liverpool forward Darwin Nunez chu tharuma Colombia fan-te nen an inbakkaihnaah a tel ve tih thlalak atangin hmuh tur a awm a, South American football thuneitu sangber CONMEBOL chuan an chhuichian nghal thu an puang.
Uruguayan outlet El Pais tarlan danin, tawpna hamrik a rik rual khan Uruguay player thiante leh chhungte awmna hmunah Colombia tantute’n tharum an chawkchhuak a, TV camera hrang hranga a lan danin Nunez hi a chipui leh laichinte thlavang hauhin a inphelhsek a, daidannaah lawnkaiin, North Carolina state khawpui Charlotte-a Bank of America Stadium-ah hian hmaisen teuhin Colombia fans a hmachhawn a, midangin an lo pawtthen chawt chawt lai hmuh tur a awm bawk.
A hnuah Uruguay captain Jose Maria Gimenez chuan thil thlen danah player-te thlavang hauhin, an thiantha leh chhungte thlavang hauhin chet an thawh ve mai tih a sawi a, police an awm miau loh avangin anmahniin an chhungte venhim hna an thawh mai a ngaih thu a sawichhuak.
Gimenez chuan chuan mi pahnih thum zu ruite thiltih atanga irhchhuak a nih thu leh engtinnge anni khan zu an in theih a hriat bik loh thu a tarlang tel.
He innawrbuainaa langsar Nunez hi Liverpool chuan June 2022 Benfica atangin sum hmahruai pound maktaduai 64-in an lei a; he thu buatsaih lai thleng hian Anfield club tan game 65-ah goal 20 a thunsak tling tawh.