Consumer Right leh Mizote

Lallunghnema
Charity Lodge
Cont: 9862288182

Khawvel ram hmasawn leh changkang zâwkte ke pên rualin India Sawrkar chu a kal ve zêl a. India ram economy thanna atana dinhmun pawimawh tak luahtu chu thil leitute service hmangtute hi an ni a. An dikna leh chanvo humhalh tul tihna pawh a lo lian tual tual bawk a. India sawrkar chuan thil leitu leh tha leh zung(service) leitute hian India ram economy siam thatna leh tihthanna-ah (economic reform&economic growth) dinhmun pawimawh ber ber an luahin an thut tlat tih a hria a. Hei hi a dik chiang hle a, tung chhova kal mi zawng zawng hi consumer kan nih vek avangin min huap vek a ni. Chuvangin thil leitu leh hmangtute mawhphurhna pawh hi a lian êm êm a. Chu chu hriain India Sawrkar chuan kawng hrang hrangin hmâ a la a.Dan eng emaw zat a siam nghe nghe a ni. Kan sawi leh thin ang, thil leitu zawng zawngte, naupang lamin mitin India khua leh tui zawng zawngte hi consumer kan ni vek tih hi a chiang a, phat theih a ni lo. Heng mipui tam ber hian an dikna leh chanvo an chang phâk lova. Dawr a, an kal te hian biak that an hlawh lova, dawrkai tam tak chêksawlh leh uan khum, tihnawmnah thlengin an tawk thin a ni.
Sumdawng lian leh hausa, dawrkai naran leh thil zuar leh hralh thinte chuan anmahni dawrtu customer-te (an buangraw leitute) chu engah mah an ngai lova, eng ualah an ngai lova, anni, leitute tel lovin an khawsa thei lo tih reng an hre si lo a ni.Thil zuartu zinga tam tak chuan an lo hmusit zawk zaw lêl thin zu nia maw le!
India mipui maktaduai tam tak hi nitina thil leitu an ni a. Hengho hian thil lei lo ta se, sumdawng ho service hmansak lo ta se, hmasawnna kal lai chu a tawp thup dawn a ni a. Ram economy than a tâwp ang a, ram mipui tuarna nasa tak a thleng dawn a. Sawrkar rorel khawl a buai phah anga, sawrkar hotute rilru nasa takin a hah phah dawn a ni. Mipui riltamna namên lo a thleng thuai ngei ang. Chuvangin ram pum pui mipui suk thlêk thlir hian thil leitute pawimawhna hi palzut chi a ni lova. Thil leitute hlutna hi dahsak a, lâk zam mai mai chi a ni lova. Thil leitute tel lo chuan India ram hi a kal thei lo a ni ber mai. Chutiang zelin Mizoramah pawh hian thil leitu leh hmangtute dinhmun hi ngaih zam chi a ni lova. Palzûtsak chi a ni hek lo. Consumer chuan awmze neiin an lei ang a, bungraw chhia an lei tir lovang a, buk tlingin thil an lei ang a, service pawh awmze neiin an hman a tul ang. Intihderna leh inbumnain hmun a chang tur a ni hek lo. Inrikrâpna leh invauna pawh a awm tur a ni hek lo. Thil leitute tlatna mualahte chuan dawrkai leh sumdawngte pawhin thil leitute dinhmun pawimawhzia an lo hre chiang tawh dawn a. Hengho hian thil dik takin an ti tawh ang a, thil leitu leh hmangtute tawn ve ve an nih miau avangin inti chhe thei an ni lova, neih ineisak thei an ni lova, intanpui tawn tur zawk an nih erawh an vawng tlat tur a ni. Chutiang rilru putnaah chuan consumer-te an zalen thin a. Thil zuartu leh service provider te tan pawh hlawhtlinna chu pangpar mawi tak angin a lo vûl dawn a ni.
Kum 30 chuang fê Consumer Movement- in Mizo thinlunga bu a khuar tawh chung hian Mizo mipui rilruah a la tla na tâwk lo hle niin a lang a. Mizo thinlung leh consumer right hi a la inpersan viau ni te pawhin a lang cheu! Mahse, mi thahnemngaite beihna zarah kan zia chho zel niin a lang thin. Chutih lai chuan kan nun chhungrilah hian danglam dawrh khawpa Dan leh Thupekte chu ngaih pawimawhna leh hriat fuhna hi a la awm thei meuh lo chu a ni a. Hetiang rilru lâu lutuk kan pai avang hian Consumer Act hian hna a thawk chak thei ta thin lo a ni.
Mizo mipui rilru put hmang hi mamawh lei leh hmanaah hian hriat thiam a har khawp mai. A tam zawk hi thil leina hmunah kan huai lova, kan dawizep a, mamawh kan sawi tha ngam lova, mamawh lo lei kan ching a, duh aia tam kan lei a, duh aiin kan inseng tam fo thin. Mamawh miah lo, kan tlawmngaih lei châng a awm fo bawk. Awh zâwng leh chák zawng lei kan awlsam thin hle. Chhungkaw mamawh ai chuan mahni châk zâwng kan lei mai thin bawk. A thau thau, a mawm tha tha kan pâk huam huam thin! Bûk tling leh bûk tling lo kan rilruah a lang lo, a lei hmasa nih inchuh kan hreh hek lo.
Kan thil leite chu chhuhsakin kan awm a, thil leiah lungawi lo ila, kan sawisel tha ngam chuang thin lo; huaisen âwm pui pui hian an duh ang an sawi chhuak ngam lo fo! Hengho tan hian Customer care leh Customer satisfaction-in awmzia a nei lo.Consumer Protection Act hi eng eng pawhin hung hnai ila, hman tangkai nachâng pawh an hre lo. Hengho hi Mizo consumer an ni tlat! Mizoramah hi chuan Danin awmzia a nei thui lo! Consumer Right-in lawm a hlawh hek lo. Nuam tâwl leh hlim hlawp thil ringawt kan ngaihtuah! Kan ngaihsan leh kan ngainat a, kan chawisante hi Vairengte pêl lo larna a ni!
Hmasang ata tawh, thil lei leh hralh hian hringnun hi englai pawhin a luah khat reng a. Hman tlak loh, hman theih loh, ei tlak loh, ei chi loh, hriselna atana hlauhawm, taksa tikâng a, tichhe thei, pian sualna thlen thei, hliampui tuarna awm thei thil kan leiin kan hmang fo. Kan lungngaiin hrehawm pawh kan ti hek lo! Dan pawisa lo, Dan palzût mî kan ni. Dan lek kawhtute lah mahni thil tih pal buak hreh lo kan ni. Customer tuarna thleng thin, hai der thiam kan ni. A mak lo ve. Khaw laia bawlhhlawh let reng pawh hêl mai thin kan ni. Mahni dikna sual chhuak tura beih hram ai chuan bei hram lova, chân kan thlang zawk. Hausa anga lan ching, hmun pal buak ching, neih nei si lova, that chhiat vanga neih chhun sum khawhral hreh hauh lo kan ni. Chhung rila tlawmngaihna chhetê pawh nei lo, pawn lam lan mawi duh avanga a lang a pauva inti thilphal kan ni mêk!
He Consumer khawvelah hian consumer lal ram din turin mi thahnemngaiten theihtawp chhuahin an bei mek a. Mizo kan ni a, Mizoramah kan chêng a, kristian kan ni bawk a. Dan zawm tur pêk kan ni a. Consumer Protection Act leh Rules kan nei bawk. Lo lâka zawm a tihhlawhtlin chu keini consumer-te mawhphurhna a ni. Eirûk leh hlemhlêna dona atana hmanraw tha tak a ni a, kan tan, kan ta a ni, tih reng kan hre si lo!
Hriat loh a ngaihdam theih loh.
Dan hre lo pawh min huam vek.
I dawizep avangin i hloh!
I tuar peih loh avangin i chân!