Consumer Rights Day hmang Kan chanvo hriatchian a ngai – FCS&CA minister

On Mar 18, 2026 14 0

Consumer Rights Day hmang
Kan chanvo hriatchian a ngai
– FCS&CA minister
March 15 kha World Consumer Rights Day a ni a, he ni denchhen hian Thawhlehni khan Mizoramah chuan hun hman a ni.
Aizawla buatsaih hmanpuitu Food, Civil Supplies & Consumer Affairs minister B Lalchhanzova chuan, mipuiin bungrua, ei leh in leh service hrang hrang an leinaah dikna chanvo an nei a, an chanvo an hriatchian a ngai tih a sawi a. Dawr kai, sumdawng, pawl leh sawrkar department chu mipui tana dawr nuam leh rintlak nih a pawimawh, tiin, mipuiin kan thil lei tum belhchian hmasak a ngai tih a sawi a ni.
Sawrkar kum kal mekah buhfai leina atan Mizoram sawrkarin cheng vaibelchhia 220 a dah atangin vbch. 138 vel sawrkarah an thehlut leh tawh tih a sawi a. Hei hi bukna dik hmang tura hma an lak avangte, buhfai bo thlau tur an ven avang leh subsidy ennawn a nih avanga sawrkar sum hum thei an ni tih a sawi. Land Revenue department chuan hna thawh that avangin Ministry of Rural Development hnauia Department of Land Resources atangin SASCI Part VII-A hnuaiah lawmman vbch. 29 an dawng tih a sawi bawk.
FCS&CA secretary Teresy Vanlalhruaii chuan, mipuiin thil lei chungchanga harsatna an tawh chuan Consumer Rights Commission hnenah an harsatna an thlen thei tih a sawi a. Mipui chanvo humhalhna atan sawrkar chuan CPGRAMS leh Mipui Aw a siam a, FCS&CA department pawh hetiang harsatna nei tan helpline no 1967 ah biak theih an ni tih a sawi.
State Consumer Protection Council member Prof. Laldinliana Varte chuan kumin thupui “Safe Products, Confident Consumers” a sawizau a. Thil siamtuten bungrua leh ei leh in tur tih chingpen an chin avangin consumer tamtakin an rinna (confident) an hloh phah thin a, consumer-ten kan chanvo hriatchian a, heng thil diklo hi do ngam a, a siamthatna tura hma kan lak zel a tul tih a sawi a ni.
He huna hian Mizoram State Consumer Welfare (Corpus) Fund atanga consumer awareness activities neihna tura sum pek VCOs/ institution pathum – Mizoram Consumers Union Hqrs Aizawl, Centre for Consumer Education leh Consumers’ Club Govt Mizoram Law College ten an achievement report an pe a. Mipui hnenah Consumer Protection Act 2019, LPG home delivery, maxi cab leh bus (public transport) rate leh thil dangte an hrilhhre thin a ni.
World Consumer Rights Day hi March 15-a hman a ni a, kuminah Pathiannia a tlak avang leh, March 16 chu Assembly Budget Session a la nih avangin, March 17 khan Aizawl bakah district headquarters tinah hman a ni.