Consumer-te hnena fuihna Plus Thil leitu dik leh rinawm a lo lang

Lallunghnema
Charity Lodge
Cont: 9862288182

Consumer Huang chhiartu zawng zawngte chibai ka bûk a che u.
Chawlhkâr kal taah khan India ram chhunga bungraw man (price) chhiar sân theih zât sang ber Maximum Retail Price chungchang ka sawi a. Maximum Retail Price chu thil man a ni lova. India sawrkarin thil siam chhuaktute kal tlanga thil man bi thliah theih zat a tarlanna a ni a. ‘Hei ai a sang hian hralh chhuah loh tur’,a tihna a ni a. Heng MRP chhungah hian thil zuartute leh sumdawngte hlêp tur a tel nghal vek a ni. Miin MRP inziak hnuai lam a thil a hralh avangin a hloh lova, a chân ngawt lo a ni. Thil man (rate/price) a ni lova, MRP aia hniamin thil zawng hralh tur a ni tihna a ni a. Thil zuartu leh hralhtute pawhin an zawm tur a ni. MRP aia sanga thil hralhtu chu Legal Metrology Act 2009 hmanga hrem theih an nih thu pawh kan sawi nghe nghe tawh a ni.
Mizote hian MRP kan hre fuh tawk lova, thil man emaw kan ti tlat hi i bansan teh ang u, kan ti a ni.
Tuna ka article-ah hian Consumer huaisen leh dik tih thupuia hmanginkan ti tiho leh dawn a. Chumi hma chuan kan thianpa, Consumer Activist thu leh hla hi i lo ngaithla phawt teh ang.
“Mizote hi kan piang sual viau mai nge Consumer awmzia kan hre tawk lo! Consumer ka ni a, thawmhnaw ka mamawh ka lei khan lungawina leh hlimna min pe tur a ni a. Lungawina leh hlimna min pek loh chuan Consumer ka nihna ka hre tawk lo tihna a ni. Eitur a ni emaw, puanthui a ni emaw, bungrua a ni emaw chawhmeh a ni emaw, damdawi a ni emaw, damdawi in a ni emaw hoah khan ka thawmhnaw min thuisak, chaw hmeh min lei sak, bungrua min lei sak, an damdawi inah min admit a. Khang zawng zawngah khan ka lâwm tawk em? Ka mamawhna min phuhruk sak em? Damdawi ina min enkawlna te, min biak dan zawng zawngah te khan ka lungawina ka hmu em? Ka duhna, sum ka senna phu tawk min pein min tih sak em? Hralhtuah khan chawhmeh zuartu, damlo enkawltu service danah, damdawi zuartu service danah customer a lo chhawn danah, puanthuitu service danah, khang zawng zawngah khan consumer-te lungawina leh hlimna an thlen em? An duhna, an mamawhna an phuhruk sak em?
A chunga kan sawi khi Marketing ti a, kan sawi vek a ni. Siam chhuaktuin a siam chhuah a hralh khan a hralhnate mamawh a phuhrûk tur a ni. Damdawi ina mi kan enkawlin a beisei angin kan enkawl em? A lawm em? tih zawng zawng kha market- tu chuan a ngaihtuahin hriat a tum tur a ni.
Thil i lei reng rengin cash memo la rawh. I right a ni. “Ho mai mai, a tul kher lo”, ti suh. Bel awm chi te, cash memo te lain a amount a dik em? Chian hnuah chauh pawisa pe rawh”.
-Lalzidinga sailo, Khatla
(Ani hi KVI Officer, rtd, Marketing Expert a niin Consumer-te dikna leh chanvo veitu a ni a. A thu leh hla hi a nih ang angin ka han khâr chhâwng a ni e – llha)
Tunah chuan Consumer huaisen leh dik tawnhriat lam kan hawi dawn a ni.
-Ni 7.July.2026 khan he Consumer dik leh huaisen hian Posture Corrector Rs. 920 man (MRP) chu Rs. 999 in a lei a ngaih tha takin a hawng a in a thlen hnuah a bawmag chuan Maximum Retail Price (MRP) lo in ziak 920 tih chu a hmu leh si a. Consumer Activist-te be rawn in a tukah chuan a thil leina dawrah chuan a thil lei leh a bawm chu kengin a va complaint a. An ni thil zuartute pawh chuan an thil tih dik loh chu pawmin lawm takin an lo refund sak leh ta a ni.
Hetiang thil dik lo siam that hi a har hle thin a. Huaisen taka kalpui a ngai thin. Mi dawizep tam tak chuan an hmachhawn ngam lo. Dawrkai pawh hi a fakawm hle. A entawn tlák êm êm a ni. Ani thil leitu pawh hi mi dik, mi huaisen a ni a. A chhuanawm hle a ni. Hetiang mi hi an vâng hle mai. Kan zawng mêk a ni.
“Aw, nang thil leitu leh service hmanga leitu mahni inveng tha la, thil hralhtute eiralin awm suh. I thil lei chu chîk takin zir la, hman hmawh suh”.
-Consumer Activist.