Contractor leh PWD lakah ACB hnenah FIR thehlut

Lunglei district Luangmual to Vaisam kawng, PMGSY sum hmanga laih meka hna a chhiat avangin a contractor leh a viltu state PWD te dan anga hrem an nih theih nana bawhzui turin Anti Corruption Bureau-ah FIR thehluh a ni.
Centre for Environment and Social Justice (CESJ) working chairman Vanramchhuangi chuan ACB-ah hian Thawhtanni khan FIR a thehlut a. Kumin March 15 khan Luangmual to Vaisam PMGSY kawng laih meka kawngsir tui luankawr (side drain) chhia video clip thehdarh a hmu a, a hma in he kawng laih mek chhe lutuk chungchang hi an lo sawi fo tawh bawk nen, RTI dan hmangin he kawng laih pawh hi dil a ni tawh tih te a sawi a ni.
‘He kawng laih hna thawktu VRS Construction Zonuam Aizawl leh a viltu, Mizoram Public Works Department (MPWD) Lunglei Road Division-II a a lu ber, engineer-te hian mipui sum (public fund) a mipui tam takin an chhawr tangkai tur, inkalpawhna kawng laih hna leh vil hna an thawhna kawngah, sum neitu mipui zahphahna chhete mah nei loin duhdah takin kawng an siam a, he kawng laih hna thawktu leh a viltu hian inang rengin ram mipui pawi an sawi a. Hetiang state meuh zah loa vantlang kawng laitute hi dan anga hren an nih theih nan hma la turin ka ngen che a ni,’ a ti.