Copa America final halftime show-ah Shakira che tha

Colombian star Shakira chu CONMEBOL Copa America 2024 final USA-a khelhah nimin tuk khan halftime show-ah a perform a, Copa-ah a vawi khat perform-na niin, a hla hlui leh thar te a medley a, a che tha khawp mai. Shakira hi che tha viau mah se a pianna ram Colombia erawh a vanduai zawkah tangin, Argentina lakah an tlawm ta zawk a ni.
Copa America 2024 final hi Hard Rock Stadium, Miami Gardens, Florida-ah khelh a ni a, Shakira hi metallic silver skirt leh halter top nen inlanin, halftime show-ah a hla hit ‘Hips Don’t Lie’ hmangin bul a tan a, “Te Quiero, Colombia!” (I love you, Colombia) tiin a lai laklawhah a chham zauh a, chutah lamthiam rual nen ‘Te Felicito,’ ‘TQG,’ leh ‘Punteria’ te a thlawh zui a, a dancing skills a la theihnghilh lo tih a chiang e.
Shakira hi khawvel huap sporting event lianah a perform nual tawh a, FIFA World Cup, Davis Cup, NBA All-Star leh Super Bowl-ah te pawh a lo inlan tawh a, tun hi international soccer tournament upa berah hian a vawi khat perform-na a ni a, khawvel huap soccer (football) match hrim hrimah halftime show a vawi khat awmna niin an sawi bawk.