Taylor Swift ‘TTPD’ record siamin kar 12 a No.1 tling ta

Taylor Swift album ‘The Tortured Poets Department’ (TTPD) chu Billboard 200 (albums) chart-ah a No.1 a, he chart-ah hian a zawnin kar 12 a No.1 tling ta a, a album dang he chart-a kar 11 No.1 thei ‘Fearless’ leh ‘1989’ te kalsanin, Swift album zinga he chart-a No.1 ni rei thei ber a ni ta a, hmeichhe zaithiam zingah album chart-a a lan theihna hmasa ber atanga kar 12 chhungin a zawn zata No.1 thei hmasa ber a ni bawk. Hetiang tithei hi mipa lamah pawh Morgan Wallen leh Stevie Wonder chiah an la awm a, Wallen album ‘One Thing at a Time’ chu chart-a a lan theihna hmasa berah No.1 ni nghalin, kar 12 chhung a zawnin a No.1 thei a (a zawn lo chuan kar 19 a No.1), Stevie Wonder album ‘Songs in the Key of Life’ pawh 1976-77 khan an tlangzarh atanga chart-a a lan theihna hmasa ber atangin a zawnin kar 13 a No.1 tawh bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
TTPD hi kar khat chhungin 1,63,000 an hralh leh a, chung zinga 90,000 chu album tak tak hralhna (traditional album sales) niin, streaming atangin 72,000 (on-demand official stream maktaduai 94.83) tlingin, album-a hla mal hralhna atangin 1,000 a tling thei bawk.
TTPD hmaa he chart-a hmeichhe zaithiam album kar 12 chin No.1 thei hnuhnung ber chu Adele ‘21’ kha a ni a, he album hi 2011-12 khan a zawn ni lovin kar 24 chhung a No.1 thei. Taylor Swift hian he chart-a No.1 kai thei album 14 nei tawhin, Jay-Z record nih rualin, soloist zinga he chart-a No.1 album ngah ber a ni a, a album hrang hrang te No.1 hun chhung belhkhawm chu kar 81 tling tawhin, soloist zinga he chart-a No.1 ni rei ber a nihna a sawh nghet telh telh bawk.
Zach Bryan album ‘Te Great American Bar Scene’ chu a kar hnihnaah 1,37,000 hralh lehin, No.17 atangin No.2-ah a invawrh a, 1,27,500 chu streaming atanga album hralhna tlukpui (on-demand official stream maktaduai 163.87) niin, album tak tak hralh chu 8,500 a ni a, album-a hla mal hralhna atangin 1,000 a tling thei bawk.
Chart No.1 hlui Morgan Wallen ‘One Thing at a Time’ chu 69,000 hralh lehin No.2 atangin No.3-ah a tawlh a, Billie Eilish ‘Hit Me Hard and Soft’ chu 58,000 hralh lehin No.4-ah bawk a la awm a, Cappell Roan ‘The Rise and Fall of a Midwest Princess’ pawh 54,000 hralh lehin No.5-ah bawk a la awm.
Chart No.1 hlui Morgan Wallen ‘Dangerous: The Double Album’ chu 40,000 hralh lehin No.6-ah bawk a la awm a, Noah Kahan ‘Stick Season’ chu 38,000 hralh lehin No.9 atangin No.7-a a insawn leh a, Shaboozey ‘Where I’ve Been, Isn’t Where I’m Going’ pawh 36,000 hralh lehin No.8-ah bawk a la awm a, Megan Thee Stallion ‘Megan’ chu 32,000 hralh lehin No.3 atangin No.9-ah a tawlh ta bawk.
Chart top 10 khartu chu Zac Bryan self titled album, chart No.1 pawh lo ni tawh niin, 32,000 hralh lehin No.12 atangin No.10 a kai thar leh a, tihian chart top 10-ah a rualin album pahnih a nei a, hetiang hi a neih vawi hnihna a ni ta a, October 2023 khan a album tuna No.10 ni lai chu No.3 niin, a album dang ‘Boys of Faith’ chu No.8 a ni bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More