Coppa Italia atanga champ lai Juve petchhuaktu Empoli

Coppa Italia atanga champ lai
Juve petchhuaktu Empoli
Nilaini zan khan Europe hmun hrang hrangah tualchhung league pangngai kar laka khelh mi cup an chhunzawm hlawm a, Italy lamah Coppa Italia khelin, France ramah French Cup leh Spain lamah Copa del Rey khelh chhunzawm a ni a, England-ah erawh Premier League an khel thung.
Turin khawpuia Allianz Stadium-a Coppa Italia quarter-final match-ah defending champion Juventus leh an mikhual Empoli chu hun pangngaiah sikhat ve ve thunin an inhnehtawk a, penalty shoot-out hmanga chak zawk zawnnaah 4-2-in mualneitu team an tlawm a, an club chanchina a vawikhatna atan Empoli-in Coppa Italia semi-final an lut.
Allianz Stadium-a fans 39,304 pungkhawm hmaah Youssef Maleh chuan darkar chanve khelh thlen dawn hnaih lamah rin loh takin mikhual hmahruaina goal a thun a, half time-ah Empoli hian sikhat faiin hma an hruai zui ta nghe nghe.
Second half tir lam minute 66-ah France midfielder Khephren Thuram chuan Kolo Muani siamsak atangin Juventus siphurh a sut a, goal dang luh belh loin penalty hmanga chak zawk zawn a ni a, Serie A lama talbuai Empoli chu vannei zawkah an tang ta hlauh a ni.
Penalty petah hian Dusan Vlahovic chuan Juve tan chhuih hmasaberin, goal kham chungah a hlawi chhuak a; a hnuah Empoli keeper Devis Vasquez chuan Kenan Yildiz-a pet dang lehin, Empoli defender Luca Marianucci chuan mikhual team chakna goal a khung zui ta a ni.
Empoli tan tun kha kum 2006-07 season hnu lama he competition quarter-final an khelh leh vawikhatna niin, champion lai an petchhuah hnuah April thla hian two-legged semi-final lamah Bologna an su zui leh dawn a; semi-final lehlamah Inter Milan leh AC Milan an intum ve thung ang.
Nilaini zan Turin khaw inkhelah khan mualneitu team lamin game thunun zawk chungin bul an tan a, an forward Nicolas Gonzalez chuan tan atanga minute hnihna a kal mek laiin a lu hmanga Kolo Muani ball pek tha zet chu goal-ah a chantir zo lo a, penalty area tlang hriam lai atangin goal kham chungah a thlawhchhuak a, kha hun remchang bawhpelh kha game an enlet huna an ui pawl a tling ngeiin a rinawm.
1-1 a nih hnua penalty shoot-out beiseia tlarhnung lama inrem phui tlat Empoli defence sutdarh tuma Juvenetus player-te goal bawh na viau thin bawk mah se vawi 15 champion chunga Coppa Italia trophy la hnem ber an nihna belhchhah turin Turin club-in semi-final an lut zo ta lo!
Thiago Motta team khan inkhel pumpuiah ball zaa 70 zet chang mah se a pawimawh ber goal-ah an chungnung zo lo tluanchhuak a, khati khawp khan a khelhah chungnung zawk mah se tum hnih chiah goal zawngin lehlam goal lamah ball an thawnlut thei a, tah pawh target an fuh zo lo ve ve a, inkhelh banah home fans-in an boo khum hluah hluah!
Empoli tan tlarhnung venhim tum tlat a phurawm zualna tur chu last 16 lamah pawh penalty pet hmang bawkin Fiorentina an lo hneh tawh a; second round-ah erawh 2-1-in Turin khaw team dang Torino an hneh thung.
Tualchhung league lamah erawh Empoli an talbuai rei tawh hle a, an league game hnuhnung vawi 11-ah chak ni hmel an hmu miah lo a, karliamta mai khan an home ngeiah Atalanta chuan 5-0 tehrengin an sawp a. relegation zone-ah an awk zui ta nge nge a ni!