Correctional Centre tiin jail hming thlak ani dawn – Home minister

Correctional Centre tiin
jail hming thlak ani dawn
– Home minister
Jail ho chu Prison & Correctional Centre tiin sawrkarin a hming a thlak mek a, Central Jail pawh a hming thlak thuai a nih a rinawm tih Home minister K Sapdanga chuan a sawi.
Set Free Ministry-in Zirtawpnia Central Jail-a graduation programme an neih hmanpuitu Home minister chuan jail hming thlak a nih tur thu a sawi a. Correctional Centre enkawl kawngah sawrkarin a tih tur tih loh tam tak a nei a, chuti chung chuan theihtawp a chhuah zel tih a sawi a ni.
Tun atanga reilote-ah Central Jail building chu sawrkarin sakthat a tum a, kum hnih thum hnuah chuan tun aia nuam leh felfai zawkin he hmun hi a awm theih an beisei tih sawiin, theihtawp an chhuah dawn a. He hmuna hun thawl tak an neih chu an thlarau tana chhandamna tuak chhuahna hmun a nih ngei a beisei tih a sawi.
“Keimahah hian enge tam ber ang aw, tih ka ngaihtuah a, insiam that ngai hi a tam ber angem ka ti thin. Biak in chhung ngeiah pawh sual puan tur nei kan thu thup a, vawiina jail tang mekte hi a sual ber leh tha thei ngai tawh lo tur in ni lo tih inhrereng turin ka chah che u a ni,” K Sapdanga hian a ti.
Set Free Ministry India buatsaihin jail-a awmte hi lehkhabu pahnih – “Nunkawng dik” leh “Krista zalenna kailawn” hmangin zirtir an ni a. Exam hmachhawn 163 hnenah graduation certificate hlan an ni.