Covid-19 hri vei awm leh

Covid-19 hri vei awm leh
Covid-19 hrileng a zia a, hun engemaw chen hri vei an awm loh hnuah Mizoramah hri vei an awm leh; April ni 13 tuka result chhuakah mi pahnih hri an vei leh.
Mi pahnih endik an ni a, hri an lo kai ve ve. Mipa leh hmeichhia an ni a, tun hnaia zin chhuak lo ve ve, Mizoram pawna zin lo ve ve an ni.
Kumina a vawi khat nan February ni 28-ah khan hri vei hriatchhuah thar pakhat a awm a, hei hi nikum December ni 12 hnua hriatchhuah leh hmasak ber a ni. March ni 2-ah hriatchhuah thar pahnih an awm leh.
February ni 28-a hriatchhuah tia puan kha a nihna takah chuan February ni 24-a mi a ni a, hriatchhuah a nihna damdawi in lamin an report har deuh avangin February ni 28-ah puanzar chauh a ni.
Tun hnaiah India ram state thenkhatah Covid-19 hri vei hriatchhuah an awm leh zeuh zeuh a, Mizoramah pawh hun engemaw chen hri vei an awm loh hnuah hriatchhuah thar an awm leh. Mahse thuneitu lam chuan thlabarna turah an ngai lo a, hri a darh leh tihnaah an ngai lo.
“Hri a leng a, min chenchilh tawh avangin hri vei hriatchhuah hi awm leh zeuh zeuh thei chu a ni. Kum ruk kum sarih vela hrileng te pawh a hnu fea hriatchhuah an awm a, chutiang deuh chu a ni,” official pakhat chuan a ti.