Myanmar atangin raltlan lut leh huk

Myanmar atangin raltlan lut leh huk
Myanmar atanga Mizorama tlanchhia an awm deuh reng a, mahse tun hnai hun engemaw chen chu a tir lam angin a hlawma tam thama lut an awm lo. Tun karah Zokhawtharah a hlawmin an lut leh tih thu dawn a ni.
Zokhawthar ral lehlam, Myanmar lama Khawmawi khuaah tun hnaiah sorkar sipaite leh sipai sorkar paih tuma beitute an inep a, hei vang hian Thawhlehni zan khan Khawmawi atang hian mi engemaw zat chu Zokhawthar-ah an tlanchhia a ni.
Zokhawthar police te chuan Thawhlehni zana Zokhawthar-a tlanlutte hi mi 110 chuang an nih thu The Aizawl Post an hrilh.
Zokhawthar atanga thu dawn danin, Khawmawi-ah hian tun hnaiah Myanmar sipai sorkar paih tuma beitu Zoland Army leh PDF sipai engemaw zat an lut a, silai te pawh a puak. Khawmawiah hian sorkar sipai an lo awm sa bawk nen, an inkap nasa leh dawn nia ngaiin Khawmawi atangin mi 100 chuang chu Zokhawtharah an tlanchhe ta a ni.
Khawmawi-ah hian Myanmar sorkar sipai camp a awm a, chumi bul hnai, Vengsang vela mite an tlanchhe ta a ni. Khawmawi chhak lawk, Rihdil chhakah Myanmar sipai camp a awm bawk a, Khawmawi velah sipai sorkar paih tumtute an inlar a nih chuan inkap mai tura ngaih hi a ni thin.
Khawmawi leh Zokhawthar nena inri, |iau lui daidan an ni a, kum hmasa lamah pawh an ralmuan loh deuh chuan Zokhawthar-ah hian an tlanchhe mai thin. A ralmuan deuh chuan an kir leh a, kar tawn zak zak reng pawh an thahnem tih thu dawn a ni. In sang vel khua ve ve an ni a, intlawhpawh tawn, inthian tha an ni.
Zokhawthar-ah hian raltlan 4000 chuang an awm mek a, a tam zawk chu relief camp-ah an awm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More