Covid veiah a zatve aia tam kum 40 hnuai lam
Covid vangin nunna chan awm leh
April thlaah Mizoramah Covid-19 a hluar leh a, hri vei zat a pung leh. Thla khat chhunga hri vei hriat tharah hian a zatve aia tam chu kum 40 hnuai an ni.
IDSP te’n an chhinchhiah danin, April thla chhung khan hri vei hriatchhuah thar hi mi 82 an ni a, an zinga mi 44 chu kum 15 leh kum 40 inkar an ni. Kum 14 leh a hnuai lam mi pali an awm bawk.
Kum 41 leh kum 60 inkar mi 22 an awm a, kum 60 chung lam mi 12 an awm.
Thla khat chhunga hri vei hriatchhuah mi 82 te hi mipa 40 leh hmeichhia 42 an ni. Mi 82 zingah hian tun hnaia state pawna zin, travel history nei pakhat a awm a, mi dang 81 chu travel history nei lo an ni.
Thu dawn danin, April thlaa hriatchhuahte hi an kaina hriat loh deuh vek an ni a, hri vei nen an inhnimhnai em tih te, tuin nge kai tih te hriat hleih theih loh an ni deuh vek.
A tam ber chu Aizawl district-a mi an ni a, mi 75 an tling. Khawzawl district-ah pahnih an awm a, Kolasib district-ah pathum, Serchhip district-ah pahnih an awm.
April thla chhunga COVID-19 hmuhchhuahte Genome Sequencing result dawn tawhah Omicron variant chi thum – XBB.1.16.1, XBB.1.16 leh XBB.1.9.1 hmuh a ni a, heng zinga pahnih – XBB.1.16.1 leh XBB.1.16 te hi variant tharlam lehzual niin Omicron variant dangte aiin inkaichhawn a awlsam zawk a, naupang leh kum upa lamah a thawk bik tih chu mithiamte sawi dan a ni. Lower respiratory tract a thlen thlak theih avangin a danglam bik tih tarlan niin mipuite tan chi-aina tur erawh a awm lova, COVID Appropriate Behaviour tha taka zawm a pawimawh hle an ti.
Vanduaithlak takin nikum October ni 29 hnuah Mizoramah Covid-19 vanga nunna chan an awm leh; May ni 1 chawhma dawr 11.20 khan Thanthluaii (63), Saron Veng chu Covid-19 vangin LRM Hospital-ah a boral a ni.
IDSP te’n an chhinchhiah danin, May ni 2 dar 12 AM thleng khan Mizoramah hri vei mi 2,39,086 an awm a, mi 727-in nunna an chan tawh. Enkawl lai mi 78 an awm. May ni 1-a endikah mi 34-in hri an vei tih hriatchhuah a ni.
Covid veiah a zatve aia tam kum 40 hnuai lam
Get real time updates directly on you device, subscribe now.