Dr Beichhua zuitute’n BJP zawm tawh Dr Beichhua-a’n thu la titlu lo

Dr Beichhua zuitute’n BJP zawm tawh
Dr Beichhua-a’n thu la titlu lo
MNF MLA thin, independent MLA ni ta Dr Beichhua-a’n eng party mah a la zawm lo a, thu a la titlu lo niin a sawi. Chutih laiin MNF atanga amah zuichhuaktu engemaw zat chu BJP-ah an lut tawh.
Amah zuitute’n BJP zawm mah se BJP a zawm ve tihna a ni lo tih a sawi a, tun hnaia Mara Autonomous District Council (MADC) huam chhunga VC inthlan dawn khan party an zawm a tul avangin BJP hi an zawm mai nia a ngaih thu a sawi.
“MADC-ah VC inthlan a awm dawn khan, party nei lova awm kha an tan a buaithlak a, chuvang chuan BJP-ah an lut ta a ni mai ang,” a ti a, “Kei chu ka tel lo a, thu ka la titlu lo a,” a ti.
Dr Beichhua hian a kal zel dan tur a ngaihtuah thu leh uluk taka ngaihtuah a tul thu a sawi a, “Tunah hi chuan a la hma deuh,” a ti.
“A la hma deuh” tih hi inthlan dawnah tihna a ni em tia zawhna chhangin, “Tunah chuan independent MLA ka ni a, party ka zawm thei lo a, chu chu nghah rih a ngai a, inthlan dawnah lo chuan tihfel theih pawh a ni lo a,” a ti.
A party zawm turah thu a titlu tawh em tih zawhna chhangin, “Concrete decision ka la siam lo,” a ti a, “Politics chu a mak khawp a, zan khat lekah thil a danglam thei a,” a ti bawk.
Party hrang hrangin an bia tih a sawi a, “Min be hlawm a, an fel khawp mai,” tiin a sawi. MNF-in lut leh turin an sawm lo tih a sawi a, “Min duh tawh lo alawm. Mi tha tak tak an awm a, min mamawh lo ang,” a ti.
Dr K Beichhua hi nikum December-ah khan minister of state atanga chawlhtir a ni a, kumin kum tir lamah MNF party atanga chhuahtir a ni bawk. Siaha district-ah MNF atangin mi engemaw zatin an zuichhuak a, an zinga engemaw zat chuan thla hmasaa MADC-a VC inthlan dawn khan BJP an zawm a ni. Hei hian Dr Beichhua kalna tur a hrilah ngaih a ni a, thu a la titlu lo a nih pawhin, tuna a lan dan chuan BJP-a lut ve turah ngaih chu a ni.