Pathianni zing khan boxing-ah inhnek ngaihven hlawh tak a awm a, super-middleweight huanga kawnghren pali kawl kawp mektu Saul ‘Canelo’ Alvarez chuan a khingpui William Scull hnehin a kawnghren a humhim. Alvarez hian September thlaah boxer lar Terence Crawford a hmachhawn zui leh dawn.
Riyadh kawpuia inhnekah WBA, WBC, WBO leh IBF champion Alvarez-a’n a khingpui Scull hneh ngei tumin tan a khawh a, round 12 an inhnek chhungin chetha zawk a ni tluan. A khingpui Scull hian beisei angin a hnek tam tawk lova, hnek fuhna hun tha nei turin an nawr tam tawk zo lo bawk. Alvarez hian a khingpui hnek tlu thei bik lo mah se endiktu pathum ten chak zawkah an ngai vek a. Point 115-113, 116-112 leh 119-109 a hnehna changin a kawnghren a humhim.
Mexican boxer Alvarez hian professional huangah inhnek vawi 67 zet a hmachhawn tawh a, vawi 63 hnehna chang tawhin draw vawi hnih leh tlawm vawi hnih ve ve a nei. Alvarez hi mipa boxer zingah division hniha kawnghren pali kawl kawp thei pathum zing a mi a ni a. Amah ang tho hian Terence Crawford, Oleksandr Usyk leh Naoya Inoue te chu division hnihah kawnghren pali la ve ve theite an ni bawk.
A kawnghren kawl mek a humhim leh hnuin Alvarez chuan a khingpui William Scull chu chak tum ngam lo, him tum ringawt a nih thu a sawi a. Chak tum ngam lo boxer te chu a huat zawng tak an nih thu a sawi tel nghe nghe.
Scull laka Alvarez-a’n hnehna a chan hnuin September thlaa a hmachhawn leh tur Terence Crawford chu ring chhungah a lut a, boxer ropui pahnte an inhmachhawn. Alvarez leh Crawford te hi September 12, 2025 khian mipui 65,000 lenna Allegiant Stadium-ah an inhmachhawn dawn a. Division pahnihah kawnghren pali kawl kawp ve ve thei pahnihte inhnek tur hi inhnek hmuhnawm tak a nih ngei a rinawm.
Get real time updates directly on you device, subscribe now.
Prev Post