CSS STAFF NUAR KHA

Lalbiakthanga
Centrally Sponsored Scheme (CSS) hi sorkar laipuiin scheme siama state sorkar a puihna a ni.
State lian zawk leh hausa zawkte chuan CSS hi an dawng tha duh lem lo, fund lian tham vak lova central mitmei ven ngai hi an peih lo a ni mai thei. Sorkar laipui pawhin state intodelh deuhte hi chu CSS-in a umzui lem lo. Keini state erawh chu kan pachhia a, sum hnar kan nei tlem si a, sum hmuhna remchang tawh phawt chu Grand in Aid a ni emaw, Loan a ni emaw, kan bawh huam huam a la tul. CSS pawh hi chutiang scheme zinga mi chu a ni. Chu scheme hnuaia thawktute chu sorkar hna thawka chhiar an ni lo. CSS employee-te hi state sorkar hnuaia lut zui tura ngaih an nih loh vangin, thawktu lak dan mumal siam a ni ngai meuh lo.
Chuvangin CSS hnuaia thawktu lak dan leh sorkar hnuaia sanctioned post luahtu lak dan hi a inang lo hle reng a, CSS hnuaiah chuan, implementing department-in a remchan dan danin an inla mai thin. A ruaitute mit an tlun a, scheme a awm chhung chuan an thawk reng thei a, a ruaitute mit an tlun loh erawh chuan eng hunah pawh chawlhtir theih an ni. Thawk tha leh thawk rei ber berte pawh an thawhna scheme ber a tawp chuan tawp ve mai tur an ni a, chu chu scheme hnuaia hna reng reng kalphung pawh a ni. In kan sa a, mistiri kan ruai a. Kum 6 hnuah kan sa zo ta a. Kan mistiri rawih pawh, chhawrna dang kan hriat loh chuan, a tawp ve tawh mai tur a ni a. “Kum 6 ngawt min ruai a, ka chak vanglai zawng ka tha i chhawr a, tunah in sak zo tawh mah la, ka rate ngai hian min ruai chhunzawm zel tur a ni,” tiin phut se, nuarin nawr zui ta chiam se, a mak kan tih viau ka ring. RUSA kan tih mai, Rashtriya Uchchatar Shiksha Abhiyan hi College zirna tihphuisuina atana a hrang hlaka central-in scheme a siam (centrally sponsored scheme) a ni a, CSS dik tak ni mah se, scheme tawp huna state sorkarin chhawr zui tura ziaka a dah awmchhun a ni.
Sorkar hmasa khan, ZMC-a thawk turin National Health Mission (NHM) hnuaia CSS employees zinga mi nurse 70 zet chu scheme siam chawp hmangin a lo dah nghet a, chu chuan CSS hnuaia thawktu dangte hnenah state sorkar hnuaia dah ngheh ve mai tura beiseina a siam a ni. CSS employee thenkhat ZMC-a dahngheh an nih lai khan ZMC kha state sorkar hnuaiah awm loin, society hnuaiah a awm a. Tun hnuah ZMC chu state sorkar hnuaia dah a ni leh ta si a, lo thawk mekte pawh an nih ang angin sorkarah an lut tel ta niin a lang. Thik tur tingin, hun hmasa lamah khan, kal paha lak, kal paha dah ngheh tak mai maite hi an lo awm em? Enfiah atan a tha hle mai.
MNF sorkar khan 2023 kum laihawl vel khan, CSS Employees Regularization Scheme a lo siam a, chu scheme chu an nemngheh hmain inthlan puan a ni a, Model Code-in a nangching a, an khawih zui thei ta lo a. ZPM sorkar a lo ding a, sorkar hmasain a lo khek, CSS Employees Regularization Scheme chu Cabinet-ah a chhawp chhuak a, hman theihin a peih ta a. CSS employee-te state sorkar hnuaia sengluhna tur tehfung chipchiar tak (check list)-te a siam a, mi thenkhat chu a dah lut (regularised) tawh nghe nghe a ni.
ZPM Sorkarin CSS employees-te tana Regularisation scheme 2024 a siam hi kum 50 chhunga sorkar ding tawh zawng zawngten an tih duh loh, nalh tak taka an pehhel thin kha a ni a. Dan mumal siam lova duhsak zawngte pawngpaw dahngheh ringawt erawh chu a awm mai thei. Tunah ZPM sorkarin CSS employee-te sorkar hnuaia dah ngheh theih dan a han siamsak ta cheng a, lawm tak aruangin, an duh ang tawkin an hawng zau lo niin an hria a, awlsam zawka luh dan phutin an nuar ta chiam chiam a. Party thenkhat, an sorkar laia ngaihsak reng reng lotute khan, “Lungngai suh u, kan sorkar hunah kan chinfel sak vek ang che u,” tiin an lo fuih pawrh rawl nen. Hetiang politics chhangchhia hi ram hruai tumten hmanruaah an la hmang duh cheu hi a vanduaithlak hle mai.
CSS employees-te hi lak an nih dawnin eng thu delhkilh nge an luhpui? An scheme a zawh hnuah emaw, zawh hmain emaw, state sorkarin a ruai zui tur a ni tih tanfung an nei em? Rawih zui ni turin eng right nge an neih? tih hi ngaihtuah ngai tak a ni. |henkhat chuan kum 20 te, a aia rei te pawh CSS hnuaiah hian an lo thawk a, an vannei khawp mai. CSS hnuaia thawk hi tunah hian mi sing khat dawn lai an awm a, rei tak tak an lo thawk tawh a, an hun tha zawng zawng an lo hmang ve tawh a, maipar thlawn ngawt tur a ni hi an lainatawm viau mai. Hetih lai hian, hei hi erawh kan hriat a tha. CSS hna pawh thawk pha lo, thalai lehkha thiam, hna zawng mek, an hun tha zawng zawng hna zawn nana hmang, hmu ta chuang lo hi mi sing nga chuang an awm. A tam ber hi politics taka duhsaktu nei ve lo, CSS employee pawh dil hmu ve thei lo an ni. Mi khawngaih thei taka inngaite hian, mi kan khawngaih dawn chuan, kum tam tak CSS hnuaia hamthatna lo chang tawhte ai hian, heng thalai rual, CSS pawh chang pha lo, PE, Contractual, Casual leh MR takngial pawh chang phak lote hi kan khawngaih zawk tur a ni, a let nga zetin an tam lehnghal.
Zirlai pawl pakhat MSU-te khan thawm an rawn nei a, dan phuahchawpa sorkar hnaa dah ngheh phut an awm chuan, dodal an tum a ni awm e. |halai hna zawng mek heti zat an awm laia chung mite kalna tur lo daltute chu ngawi renga thlir an tum lo. MZP-te thawm pawh kan hriat thuai a rinawm. Master degree chhuanawm tak tak neite pawhin Police Constable hna pawh an dil a, an zawm mek lai hian, dan tlawhchhan nei mang lova lak CSS employee-ten an hmakhua atana khaw hmu lek lova buaina an siam a, zirna an tibahlah a, damlo enkawl mek pawh an han titawp duh hi, |hangtharten an ngaidam reng hauh lo ang.
Kan ram hruaituten CSS staff te hi voter ena an en dawn a nih chuan, anni aiin a let nga aia tam thalai hna zawng mekte pawh hian vote kan nei ve tho tih hre mawlh teh se. Chuvangin PE, CSS etc te tana sorkarin Regularisatioin Scheme a lo siamsak a, quota systema a kaltirte pawh hi, |halai hna zawng mekte kawng hnawh pingtu a nih avangin, eng chen nge kan ngaihtheih dawn? Regularisation scheme reng reng hi hnawl leh tura nawr luihna an hmachhawn hun hi a la thleng lo vang tih a sawi theih loh. Tuna CSS employees-te pawh hian, |halai lehkha thiam hna zawng mekte an hmachhawn hma hian, inngaihtuah harh a, duhsakna an lo dawn tawhte hi lungawipui nachang an hriat a tha ang e.