Cyclone atan sawrkar inbuatsaih lo – R Lalzirliana

Tunhnaia Mizorama cyclone thawk tur chu hriattirna dawn lawk a ni chungin state sawrkar a inbuatsaih miah lo nia a ngaih thu MNF hruaitu R Lalzirliana chuan a sawi.
Thawhtannia MNF office, Mizo Hnam Runa inkhawmah Political Affairs Committee member R Lalzirliana chuan, cyclone thlipui leh ruahpui nasa tak thleng tur warning kan dawng lawk vek chungin, DC-in a hminga thuchhuah an siam bak sawrkar a inbuatsaih miah lo niin a sawi a. Sawrkar inbuatsaih tha se, heti lutuk lo deuh hian kan tuar thei loang maw, tih ngaihtuah theih a ni tih a sawi.
“Lei a min nasa tih chu kan hre vek a, chuti chungin hospital lian leh pawimawh em em ZMC kawng a ping rei lutuk kha a pawi hle. Dam lo tam tak awm mekna hmun, Aizawl atanga damdawi leh tul dang lakluh reng a tulna hmun khati taka an titlang muang kha a zahthlak a. Kha aia rang khan a clear theih tih a chiang. Sawrkar rintlak leh mipui ngaihsak tak tak kan nei lo tih a chiang hle,” a ti.
Home minister hlui R Lalzirliana chuan ZPM sawrkarin thla khat chhungin dan loa bungraw tawlh tihtawp an sawi ri nia sawiin, “Insawi theih nana hetiang hi hman chi a ni lo. Kuhva tawlh pawh tun thlengin mipuiin tlaivara duty-in an la buaipui mek a nih hi,” a ti.
Police 1047-in vote an thlak thei lo chu pawi a tih thu sawiin, “Kum 10 Home minister ka nih chhung khan hetiang hi vawi khatmah a thleng lo. Central lamin an rawn demand apiang kan ti ngawt ngai lo. Chief minister IPS, central hlau em em kan nei a. Ramri hung chungchangah pawh kan duh lo em em a. CM berin, ‘kan thuneihna piahlam a ni, kan hnial thei loang’ a ti a. Vaiho thu thua awm tum CM kan nei hi a thlamuan thlak loh hle,” R Lalzirliana hian a ti

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More