Czechia an chak zo lo leh

World Cup 2026 ah beisei phak lova bul tan Czechia (Czech Reoublic) chuan beisei an phak lo chhunzawm a, South Africa an hneh zo lo ringawt. An chak zawh loh vangin Czechia hi dinhmun harsa zawkah an din phah.
An match khatnaa tlawm ve ve an nih vangin Czechia leh South Africa tan last 32 luh beisei zui turin tlawm a thiang tawh lo. A tlawm zawk zawk chu puanthuah tel tur an i tawh vangin Mercedes-Benz Stadium-ah chak ngei tumin tan an khawh. An ni pahnihah hian Europe-ah pawh team vangtlang tak ni phak Czech chu chak tura rinkai zawk an ni.
Chak tura rinkai zawk Czechia in rinlawk ang ngeiin bul an tan tha a, goal pawh an thun thuai. Inkhel tan atanga minute rukna lekah Michal Sadílek chuan hmahruaina goal a thun nghal. Hma takah goal an thun vangin an phur a, goal tam zawk thunin point thum an hlawhchhuah ngei a rinawm hle.
Bul tan thain, phur viau mah se inkhel a rei a, Czechia an nawi tulh tulh. Thahrui ngah zawk leh khawlum ngam zawk South Africa an chungnung tulh tulh a, goal thun tuma an khingpuite nawrin hlauhawm an siam ta fo. Hun rei tak chhung goal lut a awm belh theih loh hnuin hun tawp dawn hnaihah South Africa an che fuh ta nge nge a, penalty an hlawhchhuak. Pavel Šulc handball vanga penalty an hlawhchhuah chu Teboho Mokoena chuan minute 83-naah pet goal in an si phurh a sut.
Goal an thun hnuin South Africa an phur zui viau a, an khingpuite an nawr na hle. Czechia pawhin goal thun tumin tan khawh thin mah se an hlawhtling zo tawh lova, 1-1 a inhnehtawkin, Czechia an chak zo lo leh. South Korea laka tlawm tawh Czechia hian South Africa lakah beisei an phak lo zui leh a, World Cup 2026-ah beisei phak lo ber ang hiala ngaih theih an ni ta hial a ni.
Czechia hian group champion ni a last 32 lut chiang tawh Mexico an hmachhawn zui leh dawn a, B team hmachhawn tur an nih vangin chak theihna chance an nei. South Africa in South Korea lakah fiahna hautak an hmachhawn zui a ngai dawn thung.