Sanglura’n MTTA App tlangzarh

Tunkar Ningani chhun khan Mizoram Table Tennis Association (MTTA) chuan Mizoram table tennis player-te bakah club leh district association-te hman tur MTTA App a tlangzarh.
App tlangzarhna hun hi Mizoram Lokayukta Office, MINECO-ah buatsaih niin, MTTA senior vice president Sailoliana Sailoin he hun hi a kaihruai a, Mizoram Lokayukta member Lalsanglura’n App hi tlangzarhin, MTTA app developer Dr. C. Zorammuana’n MTTA App hman dan tur a sawifiah ve bawk.
MTTA App tlangzarah hian App pathum awmin, chu’ngte chu – MTTA Ranking App, MTTA Entry Form App leh MTT Hall Management App-te a ni.
MTTA Ranking App hi MTTA ranking siamna tur leh player-te’n ranking an en zung zung theihna tur bakah mahni rank, point leh tournament khelh dan kimchang en a, duh hun huna an download theihna tura duan a ni.
MTTA Entry Form App hi tournament siam dawna thil tul zawng zawng – entry fee, category leh seeding siamna tur a ni thung.
MTT Hall Management App hi MTT Hall tana siam niin, hall dinhmun, hawn leh khar a nih dan en theihna, hall fee pek dan kimchang enna tur te, pawl leh a huhoa hall hmang duh tana book theihnate bakah QR code hmanga en tur gate pass dah tel a ni bawk.
Heng App pathum bakah hian MTTA website leh MTTA social media account hrang hrangte awlsam taka hmehchhuah theih tura dah tel a ni.
He App tlangzarhtu Lalsanglura chuan Mizoram Table Tennis Association hmalakna chhuanawm a tihzia sawiin, hriselna atana table tennis khelh thatna hrang hrang a tarlan bakah Mizote pian leh theihna nena table tennis chu game inhmeh tak a nih thu a sawi lang tel bawk.