Mizoram sorkar hnuaia thawk pawl hrang hrangte’n Nilaini hian DA, hlawh lak tlai leh pension hun chungchang an ngaihtuah dawn a, FMGE&W (Federation of Mizoram Government Employments & Workers) huaihawtin sorkar hnathawk pawl hrang hrang an inhmuhkhawm dawn.
-- Advertisement --
Thu dawn danin, Dearness Allowance (DA) chungchang an ngaihtuah dawn a, DA rate hi thla ruk dan zelah tihpun thin a ni a, Mizoram sorkar hnathawkte DA pawh tipung ve zel turin sorkarah ziakin kan thlen tawh thin a, sorkar hotute pawh vawi hnih vawi thum kan sawipui tawh a, amaherawhchu hmasawnna kan nei thei rih lo an ti.
Supreme Court-in sorkar hnathawkte hlawh a hun taka pek tur a ti chungin Mizoram sorkar hnathawkte’n hlawh an la tlai tih an sawi a, nikum February ni 18 khan chief minister an sawipui tawh a, ani pawhin a hun taka hlawh an lak theih nan hma an lak tur thu a lo hrilh niin an sawi.
“Amaherawhchu thla tam tak chhung chu hlawh pekchhuah tlai a ni leh ta a, chuvangin sorkar hnathawk mi tam takin harsatna kan tawk mek a ni,” tiin FMGE&W chuan inhmuhkhawmnaa tel tura sawmna lehkhaah an ziak.
Pension hun chungchang pawh an thu ngaihtuah turah hian a tel a, pension hun hi kum 62 ni se tia dilna an thlen chungchang ngaihtuah an tum.
“FMGE&W-in General Conference-a kan lo rel tawh angin Mizoram sorkar hnathawkte retiring age chu 62 yrs-a tihsan turin sorkar-ah dilna kan thlen a, Dt.23.6.2022- khan chief minister chuan cabinet meeting-ah ngaihtuah a nih tur thu min hrilh a, amaherawhchu tun thlengin cabinet meeting-ah ngaihtuah a la ni lo a,” tiin sawmna lehkhaah an ziak.