Mizorama dan lova pem lutte’n death certificate leh birth certificate an nei thei thin a, tun atang chuan a theih tawh dawn loh.
-- Advertisement --
January ni 30 khan chief registrar of births and deaths-in circular a chhuah a, dan lova rawn pem lut (illegal immigrant) te hnenah birth certificate leh death certificate pek loh tur tih a ni.
Hemi chungchanga thuneitu sang Inter-Departmental Coordination Committee (IDCC), nikum October ni 31-a thu khan Mizorama dan lova lutte hnenah birth certificate leh death certificate pek tawh loh ni se tiin an lo rel tawh a, Thawhlehni khan circular chhuah a ni ta a ni. Circular-ah hian chief minister pawmpuinaa circular hi chhuah a nih thu ziahlan a ni.
Birth certificate leh death certificate chungchang hi Registration of Births and Deaths Act, 1969-ah ziahlan a ni a, thu dawn danin, he danah hian foreigner, dan lova lutte hnenah pek tur tih emaw pek loh tur tih emaw a lang lo. A hma chuan death & birth registrar te chu dan lova pem lut pawh ni se, an bial chhungah chutiang an awm a nih chuan chhinchhiaha certificate pek mai tur tia hriattir an ni. Chutiang chu chhunzawm a ni dawn ta lo a, a hmaa lo pek tawhte pawh cancel a ni dawn ta a ni.
Hetianga ziahluh (registration) hi a hmain tihsual thilah a lo awm a nih pawhin chutianga inziahluh leh certificate lo pek tawh chu cancel a nih bakah birth/death register atanga paih (delete) a ni ang tiin circular-ah hian an ziak.
Dan lova pem lutte hnena certificate pek loh tur tih hi, dan lova pem lutte’n khua leh tui nihna (citizenship) dil nan an hmang ang tih a hlauhawm vang a ni tih thu dawn a ni.