Damdawi in pahnihin tehna paltlang

Damdawi in pahnihin tehna paltlang
India rama sawrkar damdawi in tha bik tehnaah Mizorama damdawi in pahnih – Mamit District Hospital leh Kolasib district-a Bukpui Primary Health Centre an tel thar.
National Health Mission mission director Dr Lily Chhakchhuak sawi danin, India rama sawrkar damdawi in tha bik tehna, National Quality Assurance Standards (NQAS) ah Mamit Hospital hian 86.09% a hmu a. certification hi department 7 – Accident & Emergency, Blood Bank, Paediatric Ward, Labour Room, Laboratory, Radiology leh General Administration-ah an hmu. Heti hian Mizoram District Hospital 7-in NQAS national certificate an nei mek.
Mamit District Hospital bakah hian primary health centre NQAS national certificate hmu thar zingah Bukpui PHC telin 94.94% an hmu. Mizorama PHC-ah NQAS national certificate hmu 12 an awm ta a ni.
Mizorama sawrkar damdawi in 21 chu NQAS national certificate nei tawh an ni a. Tunah hian sawrkar damdawi in 26 velin state level certificate nei tawhin national certificate an dil mek a ni.
Health & Family Welfare minister Lalrinpuii chuan, India rama damdawi in tha bik thlan chhuah zingah Mizorama damdawi in an awm belh zel chu mellung pawimawh tak a ni, tiin, district leh state-a damdawi ina thawktute thawhrimna leh taimakna chhuanawm a tih thu a sawi. Heng tehna hi sawrkar damdawi in pantu damlote chu a chhawr tangkai bertu tur an ni tih a sawi bawk.