Dampa bial inthlan campaign vawrtawp thleng tan

Dampa bial by-election lo awm turah political party-te leh an candidate-te’n theihtawp an chhuah mek a, campaign boruak pawh a vawrtawp a thleng mek.
By-election hi November ni 11-a vote thlak tur a ni a, chumi hma darkar 72-ah campaign hun a tawp ang. Chuvangin campaign hun a tam tawh lo a, kar hmasa lam atang khan campaigner-te an tang zual hle.
Dampa bial inthlan lo awm turah hian inthlan boruak a nung hrim hrim a, inthlan puan hmain ZPM, MNF, Congress leh BJP te’n candidate an puang hmang. Candidate tur an puan hian campaign an tan nghal a, campaign thawm pawh a ring nghal hle. Bial pawh atang pawhin ngaihven a hlawh a, politics titi a tling.
Campaign dan ber chu vantlang inkhawm buatsaih leh mi ina len kual a ni a, vantlang inkhawm hi a kal mar hle. Khaw hrang hrangah party-te’n campaign office an hawng a, a lun hlawm hle bawk.
Aizawl atangin campaign-in party mite an kal deuh reng a, mikhualin an awm chilh reng. Delhi atangin minister leh BJP mi pawimawhte an campaign a, BJP tan Tripura MLA pathum an campaign bawk.
Dampa bial atanga thu dawn danin, candidate-te leh campaigner-te’n kawng chungchang an sawi vek a, bial chhung kawng siamthat thu an sawi vek. Inthlanpui aiin by-election-ah hian inthlan thawm a ring zawk an ti a, campagner-te pawh an tang zawk a, mipuiah pawh titi a tling zawk an ti.