Dan anga hna thawk lo society 8 titawp

Champhai district-a dan anga hna thawk zui lo cooperatibe society 8 chu tih tawp an ni.
District Cooperative Development Committee (DCDC) Champhai chu an chairman, bawrhsap Mohammad Aaquib hoin an thukhawm a. Heta report danin, an district-ah tun dinhmunah cooperative society 180 an inziaklut a, society nung lo pathum – Zokhawthar Multipurpose, Khuangleng Multipurpose leh Champhai Vengthar Pig Producer Cooperative Society Ltd. chu tihnun thar leh niin, dan anga hna thawk zui lo society pariat tih tawp an ni thung.
Sawrkar thuchhuak angin hmun hrang hranga dan loa hralh thin tih rem a nih theihnan cooperative society-te hnenah petroleum license pek a ni a, uluk taka endik an ni. Pradhan Mantri Kisan Samriddhi Kendra (PMKSK) hnuaiah loneituten hlawk zawka leitha an lei theihna turin Champhai LAMB PACS Ltd leh Vaphai MPACS Ltd hnenah license pek an ni a. PMBJK (Jan Aushadhi Kendra) hmanga mipui hnena damdawi tlawm leh tha pek chhuah a nih theihnan ruahhman mek a ni bawk.
Sawrkar laipui Ministry of Cooperation hmalakna in PACS hi hmasawnna mil zela thlak danglam niin, computerization kalpui mek a ni a; Champhai district-a PACS 5 chu hlawhtling taka e-PACS (electronic) kalpui tawh niin, a thawhhnihna atan Kelkang M-PACS Ltd leh Zotlang M-PACS Ltd. hnenah hmanrua (hardware) pek an ni tawh. A thawh thumna atan society pasarih thlan chhuah tawh niin, kumin chhung hian peihfel hman beisei a ni.
Ministry of Cooperation ‘5th Foundation Day’ leh ‘Cooperative Week 2026’ pualin Champhai district chhung hmun hrang hrangah hnatlangin thing phun a ni a. Khaw hrang hrang – Mualkawi, Zotlang, leh Ngur-ah zau zawkin cooperative society kaihhnawih inzirtir tum a ni.