Dan anga kal tum vangin power bill pun belh dawn

Dan anga kal tum vangin
power bill pun belh dawn
Electric current kan hmanna tur hrang hrang chhutlawkna, connected load aia tam hmang kan tam a, dan ang taka department a kal tawh dawn avangin power bill a pun phah nual dawn tih Power & Electricity minister F Rodingliana chuan a sawi.
Assembly Session neih zawh takah P&E minister chuan consumer-ten electric supply chungchangah connected load kan bawhchhe nasa hlawm hle tih sawiin, hemi siamtha tur hian department-in hma a la mek tih a sawi.
Connected load hmang sual nasa ber chu biak in a ni tih sawiin, tunhnaia an chhui chinah biak in 259 chuan an connected load aia let 40-a sang an hmang tih a sawi.
“Biak in kan sa a, kan sa lian zel a, sound system a lo tam zel a, a thenin air conditioner (AC) kan hmang a, lift dah an awm bakah light kan ti tam zel a. A tira connected load angin a then chu kan bill rih,” F Rodingliana hian a ti.
Amah ngei pawhin a lo bawhchhe nasa tih a inhrechhuak a, chhungkaw tam zawkin kan bawhchhiat a rinawm tih a sawi. “AC lei dawn te hian department (P&E) a in report a lo ngai a, connected load hi tih pun zel a lo ngai a ni,” a ti.
Power hmanna tam zelah kan in-report loh avang hian a tira kan connected load report angin bill kan chawi a, tunah chuan a dik taka chawi theihnan dan angin an kal tawh dawn tih minister hian sawiin, “Kan electric bill a lo pun pawhin, a multiplying factor a pung ni loin, kan hman dan dik tak kan chawi a ni tih mipuiin kan hriat a ngai,” a ti.