Dan dik loa Lengpui ram lei danah VUC inrawlh se – MPCC

Dan dik loa Lengpui ram
lei danah VUC inrawlh se
– MPCC
Lengpuia dan loa Indian Air Force tana ram lei leh compensation tam uchuak pek, mantang ei tam tak an awm nia langah ZPM Val Upa Council chu inrawlh a, chhuichianga action la turin an phut tih Congress party chuan an sawi.
MPCC thuchhuak chuan, kum 2023 inthlan hma khan ZPM-in thutiam tam tak an neih zingah Val Upa Council (VUC) thuneihna leh an function chungchang a tel a, ZPM Constitution 4:4 ah pawh a inziak tih a sawi. An sawrkar hmaa an sawi pawimawh, sawrkar khalh ngiltu tur, zilh ngai zilh a, ban thei hial tura thuneihna pek nia an sawi a ni tih a sawi.
Tuna an thlen chinah erawh VUC hnuhma leh inrawlhna hriat tur a awm loa, ZPM sawrkar hnuaia Lengpui ram, dan kalkana IAF hnena hralh a ni leh sum tam uchuak tak mantangah a kal ral chungchangah pawh VUC chu an awm nge awm lo tih hriat loh khawpin a reh hmiah tih a sawi a ni.
2023 inthlanpui hmaa tuna chief minister ni ta Pu Lalduhoma thusawi tarlang chhawngin, ‘Val Upa Council kan nei a, kan referee hamtu tur an ni. An ham strict viau dawnin a lang a. Zilh zilh pawha sim duhlo chu an len lawp lawp dawn a ang viau mai. Chuvang chuan hetiang kan system-a a lo awm hi kan danglam bikna a ni. Congress sawrkar khan Ethic Committee an din a, MNF sawrkarin Spiritual Committee a din bawk a, engmah an ti thei loa, an inrawlh an hlau emaw tih tur a ni. Keini chuan VUC hi kan thatpui dawn tih kan hriat avangin kan goal vengtu ah kan hmang dawn a, chief minister thlengin an mit a tlin loh chuan an tidanglam thei dawn a ni,’ tia a sawi thu MPCC thuchhuah hian a sawi.
ZPM Valupa Council ami Maj. Thanruma’n kum 2024-a chanchinbua article a ziahah, VUC hmalakna chu confidential a ni tih a sawi chu thil mak tak a ni, tiin, ‘Hmalakna nei ni se, Lengpui ram hralh dan diklo leh sum tam tak mantang ei an awm anga langah hian mipuiin a nghawng kan hre ngeiin a rinawm. Thil te tham a nih loh avangin a nghawng a na dawn a, hmuh hmaih theih a ni dawn lo. Chuvangin hmalakna an nei ngai lo zawk niin a lang,’ a ti.
He ram inleina chungchangah hian MNF sawrkar kalta khan ram inlei phalna a pe a, ZPM sawrkarah hralh a ni thung tih MPCC hian sawiin, kut an thlak ve ve avangin inpuh tur chuang bik an awm loa, ram leh hnam pawi nasa takin an khawih a ni tih inpawmin Mizoram mipui hnenah ngaihdam dil se, an tihsual hi siamtha se an duh tih a sawi a ni.
VUC member-te chu an sawi angin, mi zahawm tak tak, mi dik leh eiruknaa fihlim awmna nia a lan avangin, Lengpui ram inlei dan diklo leh eirukna liantham tak awm anga langah hian hma an la lo a nih chuan, an zahawmna nasa taka tlahniamin member-te pawhin mipui rin an hlawh lo thei tih a sawi.
‘Thu an nei tak tak a nih chuan he thil dikloah hian kut kuangkuah mai loin, chhuichiang se, ZPM ministry an lo inrawlh ngei a nih chuan hma la in, mantang dawng an awm chuan chief minister pawh nise ban theihna power an neih angin ban se tih hi kan ngenna a ni,’ thuchhuah chuan a ti.