Dan kalha petrol zawrh….

Nimina sawrkar thuchhuahin a tarlan dan chuan, Aizawl district bialtu magistrate-in Aizawl district chhungah phalna nei lova petrol leh diesel zawrh a khap a. “He thupek hian sut leh a nih loh chuan chhuah a nih atanga kar hnih (2) chhung a huam ang” tiin.
Tunhma pawhin hetiang khapna dan hi tihchhuah a lo ni tawh thin a, a tlangpuiin thla hnih chhung a huam thin; tun tum hi khap hun chhung a rei lo hle a. Khapna hi inpha man zata tihchhuah chhunzawm zel a nih loh chuan dan kalha petrol zuarten ‘khapna thupek a tawp tawh alawm’ tih hun an nei palh mai ang tihte pawh a hlauhawm rum rum mai.
Aizawl khawpuiah hian ni tina langsar taka dan bawhchhiatna thlen rengna hmun pakhat a awm a, chu chu treasury square-a Mizofed filling station bul mai hi a ni. Mihring nuai li dawn awmna Aizawl khawpuia petrol a harsat em em lai, free sale tur pawh awm lova coupon nei chauhvin petrol/diesel an lak theih lai khan, Mizofed filling station bul maiah chuan a black-a petrol zuar an intlar thla tuarh a, ualau takin petrol an zuar a, customer inchuhin an au noh noh thin. Mizofed filling station atanga hla loteah khapna thupek chhuah theitu magistrate office a awm nghe nghe bawk.
May ni 10-a khapna hi tihchhuah a nih vang te pawh niin a lang a, nimin kha chuan helai hmuna black-a petrol zuar thinte kha hmuh tur an awm ta lo a. Engtia rei nge a awh theih dawn tih chu hunin a la rawn hril leh mai dawn a.
Kum 2019 June thla khan, a district huap pawh ni lem lova helai Mizofed filling station bul hnaia petrol black-a zuartute chauh tinzawna khapna thupek chhuah a lo ni tawh a. Khami tum pawh khan Section 188 IPC hmanga hrem theih tih niin, thla hnih chhung huam tura tih a ni. Khapna thupek chhuah hnu lawkah a han reh deuh duak a, mahse rei lo teah ngai a awh leh thuai a, tun hun hi kan thleng leh ta a ni. Dan kengkawhtute hian an peih rei lo zawk niin a lang.
District hrang hrangah pawh police leh legal metrolology enforcement staff tangrualten dan kalha petrol zuarte hi an vai thin a, man pawh an nei thin; mahse, tun thleng hian a reh hlen thei tak tak lo. Thupek hi thla hnih danah inzawm zatin tihchhuah pawh ni se, Section 188 IPC emaw, Section 7 of The Essential Commodities Act, 1955 emaw pawh tlawhchhan se, dan hi kenkawh a nih si loh chuan, a reh hlen dawn chuang lo tihna a ni ber awm e.
Khapna danin zawm a hlawh loh chhan ber hi chu, dan kengkawhtuten mar pata dan an kenkawh theih thin loh vang hi ni berin a lang. Ram changkang te hian ‘dan an ngai pawimawh lutuk’ kan han ti thla zen a, dan kengkawhtuten dan an kenkawh reng vang a ni mai a. Kan tih ang hian ti ve ta se, ‘ram changkang’ tia sawi an hlawh pha bik hauh lovang.