Dan loa lakluh cigarette cheng nuai 150 hu man tawh

Dan loa lakluh cigarette
cheng nuai 150 hu man tawh
Kum 2022- 2023 chhungin Mizoramah dan loa cigarette lakluh pack 187340 man niin, hei hi an hralhna ang chuan cheng nuai 150 hu a ni.
National Tobacco Control Programme (NTCP) leh Legal Metrology Mizoram chuan khauh zawka vaihlo khap a nih theih dan tur, dan loa cigarette lakluh (contraband cigarettes) tihtawp a nih theihna’na tan lakho dan leh hmalakna thlir hoin Ningani khan an thukhawm.
Legal Metrology chhinchhiah danin, kum 2015 leh 2016 chho atang khan nasa zawkin Mizoram district 5-ah a bul tanna’n dan loa lakluh cigarette tih rem beihpui thlak a ni a. Kum 2016- 2018 inkar chhungin district 8-ah cigarette pack 166982 man a ni. Hei hian Mizorama dan loa cigarette hmanga sumdawnna hi a lian hle tih a tilang a ni,” tiin, 2022- 2023 inkar khan Mizoramah cigarette pack 187340 man a ni a. A sumfaia chhutin nuai 150 chuang a ni a. An thil man hi a remchan dan angin Legal Metrology hian a tichhe thin a ni.
Legal Metrology hotute sawi danin, khawchhak lam atanga dan loa cigarette lakluh zaa 60 hian Mizoram leh Manipur a paltlang a. Manipur aiin Mizoram hi kalkawngah hman nasat zawk a ni. Kum 2016 khan India siam cigarette atanga chhiah lak, cheng nuai 1475 let 3/4 dawna tam, dan loin cigarette lakluh a ni. “Banphak maia cigarette awm hian naupang leh kum tlinglo zingah vaihlo zial zuk a ti hluar a. Heng cigarette-te hi a him lo bawk a, hriselna in a tawrh phah hle,” an ti.
NTCP hotute lamin COTPA leh a hnuaia dante sawifiahin, vantlang zinga vaihlo zial zuk, kum tlinglo hnena vaihlo hralh, vaihlo zuk ti chakawm zawnga advertisement leh sponsorship bakah zirna in hnaivaia vaihhlo kaihhnawih hralhchhuah phal loh a nih dan an sawifiah. Dan loa khawchhak lam atanga cigarette lakluh man leh dapchhuah, tih riral kawnga Legal Metrology hnathawh fakawm an tih thu an sawi.
NTCP leh Food & Drugs Administration, H&FW tangdun chuan Mizorama Gutkha & Tobacco Product hrang hrang khap leh khuahkhirh a nih theihna’n leh hemi kawnga tan lakho theih dan tur ngaihtuahin Nilaini khan an lo thukhawm tawh a ni.