Vantawng Group YMA-in Thenzawl district dil rel

Vantawng Group YMA-in
Thenzawl district dil rel
Vantawng Group YMA chuan Thenzawl district a pian theihna’n hma lak a rel.
Thenzawl khawchhung YMA Branch 9 bakah Neihloh, Buangpui, Kanghmun South leh Zote South Branch YMA telna, ni hnih awh tur Vantawng Group YMA Inkhawmpui vawi 25-na chu Ningani khan Thenzawlah neih tan a ni a. Rorel inkhawma thu rel zingah – Thenzawl district a pian theihna’n Group YMA-in chak taka hma lak, Thenzawla RD Block a awm theihna’n hma lak, Group YMA hnuaia zirtirtu mahni post niloa awmte mahni post ngeia thawk tura hma lak, Thenzawlah Sub-Treasury Office a awm theihna’n hma lak, tihte a tel.
Vantawng Group YMA buatsaiha Chapchar Kut hman, Vanva luidung a lo thianghlimna’na hma lak, Branch hrang hrang fai inelna neih, ruihhlo do kawnga chak zawka hma lak leh environment humhalh kawnga hma lakte pawm a ni bawk.
Kum 2022 rorel inkhawm leh tun inkha‌wmpui inkara YMA member boral mi 82 sunna hman a ni a. Nizan khan vantlang inkhawm neiin, Vantawng Group YMA Inkhawmpui kum 25 tlin, Silver Jubilee mei det a ni. Vawiin – March 31 hian Inkhawmpui hi chhunzawm a ni ang.
Vantawng Group YMA hnuaia YMA Branch 13 awmah hian member mipa 3674, hmeichhia 3081, an vaiin member 6755 an ni.