Darkar 3 vur-ah inchiahin record siam

Tunlai khawvawt mai maiah pawh a lum thei ang bera inthuam loh chuan kan awm hleithei lo a nia, Polish nu pakhat ve thung chu vur karah darkar 3 leh minute 6 leh second 45 awmin Guinness World Record a siam. A hming chu Katarzyna Jakubowska, kum 48, a ni a, hmeichhe zinga taksa zawng zawng vurin a khuh vek (full body contact) chunga awm rei thei ber record-ah an puang a, mipa lamah pawh phak loh pakhat chiah a nei a, a Polish pui tho Krzysztof Gajewski niin, ani hi darkar 3 leh minute 11 leh second 27 a awm thei ve thung a, Katarzyna hian minute 5 vel lekin a pha lo a ni.
Hetiang record siam tur hian taksa tihlumna thuam engmah hmang lovin, bawm chhungah an awm a, an nghawng thleng vur-in an vur khuh vek thin a ni.
Katarzyna Jakubowska chuan, “Hmeichhia te pawh hi kan tuarchhel ve hle tih hi ka pawmdan a ni a, kan duh a, kan tum chuan kan ti ve thei tih lantir ka duh a ni,” a ti.