Data Protection Bill thar July thla-ah

Centre chuan Supreme Court hnenah Digital Personal Data Protection Bill chu July thlaa Parliament Monson Session neih hunah pharh a nih tur thu a hrilh.
Hei vang hian he mi chungchang chu five-judge Constitution Bench of Justices K. M. Joseph, Ajay Rastogi, Aniruddha Bose, Hrishikesh Roy leh C. T. Ravikumar te chuan August thlaah ngaihtuah leh turin thutlukna an siam a.
Centre aiawha ding Attorney General R. Venkatramani chuan Bench hnenah personal data protection Bill chu peihfel a nih tawh thu leh Parliament Monsoon Session-ah pharh a nih tur thu a hrilh a.
“Bill peihfel a ni tawh a, Monsoon Session July thla tawp lamah Parliament-ah pharh a ni ang,” tiin Attorney General chuan a sawi a.
Hei hi chhang letin Bench lam chuan, “July thlaa kan list chuan ngaihtuah mek a nih dawn avangin August a ngaihtuah a fuh ang,” tiin a chhang a.
“AG sawi angin he Bill hian thil hrang hrang a huam dawn avangin July 2023-a Monsoon Session-ah pharh a ni ang a. Thil awm dan thlirin Chief Justice of India chuan Bench dinin August chawlhkar khatnaah ngaihtuah ni se” tiin Bench chuan a sawi zui bawk.
A hmain Counsel lam te chuan top court hnenah Bill chu hun rei tak parliament-ah pharh lova a awm tawh thu sawiin hei vang hian ngaihtuah an ngiat a.
“Inrawnkhawmnain hun a awh rei em a, dan tha tak siam kan duh vang a ni” tiin Attorney General chan a chhang thung a. He case hi zirlai pahnih tena WhatsApp’s 2021 Privacy Policy an khinna niin WhatsApp in user data te parent company Facebook te hnena a shar chuan privacy leh free speech a bawhchhia an tih vang a ni.
Nikum khan Apex Court chuan sorkar chuan Bill an siam chu parliament ah a pharh emaw a hmangtu tena an hlauhthawna privacy thil chu chingfel emaw turin a ti a, a nih loh chuan case a ngaihtuahah thutlukna a siam tur thu a hrilh a ni.
A hmain Centre chuan WhatsApp hmangtu Indian mite chu ram danga mite nena thliar hran a rem lo tiin a sawi a, Data Protection Bill hlui chu a hnawl tawh thu leh Parliament ah a thar a put luh tur thu a sawi a.
Senior Advocate Shyam Divan, petitioner aiawha ding chuan Bench hnenah Indian users te chu an fundamental rights chhuhsak niin ram danga mite nena thliar hran an ni a ti a, a bik takin European Union rama mi te chu an privacy zahsak an nih laiin Indian mite chu an ni ve lo a ti.
Senior advocate Kapil Sibal, WhatsApp aiawha ding chuan Bench hnenah European ram te chuan dan an neia chu chu zawm a ni mai a, India ah pawh India dan chu WhatsApp in a zawm mai a ti thung.
He case hi zirlai pahnih Karmanya Singh Sareen leh Shreya Sethi te thehluh niin WhatsApp leh Facebook te chuan calls, photograph, texts, videos leh documents te a hmangtute privacy leh free speech bawhchhiain an in share tawn vek an ti a ni.