Arvind Kejriwal kaihhruai Aam Aadmi Party chu Election Commission of India (ECI) chuan national party nihna pein chutihrual chuan Trinamool Congress, Communist Party of India leh Nationalist Congress Party te national party nihna a laksak thung.
NCP, CPI leh TMC te paih an nih tak avang hian India ramah national party paruk- BJP, Congress, National People’s Party, CPM, Bahujan Samaj Party leh AAP te an awm ta a ni.
Election Commission rules ang chuan party chu state pali-ah state party an nih chuan national status pek tur a ni tih a ni a. State party dinhmun chang thei tur chuan Assembly seat hnihah leh Lok Sabha poll-ah valid vote atanga 6 per cent tal hmuh tlin ngai a ni.
AAP te hian tun hnai lawka Gujarat Assembly inthlanah vote share 13 per cent dawn an hmu a, chu mai bakah Delhi, Goa, Punjab leh Gujarat-ah te state party dinhmun chelh pha an ni bawk.
Delhi Chief Minister Arvind Kejriwal chuan, “Hun rei lo te chhungin national party? Thil mak a ni ringawt mai. Mipui vaibelchhe tel ten he dinhmun hi min thlen a ni. Mipui ten kan lakah beiseina sang tak an nei a, vawiin han mawhphurhna nasa tak min pe a ni. Lalpa, mal min sawm la, kan mawhphurhna kan hlen theih nan,” tiin a sawi.
Kar kalta khan Karnataka High Court chuan April 13 hma ngeiin national party te tihchianna siam turin ECI chu a tih hnuah AAP te hian national party nihna an hmu ta a ni. Tihian May 10-a Karnataka inthlanna neih chu AAP tena ‘national party’ ni chunga inthlan an hmachhawn hmasak ber a ni dawn ta a ni.
Chutih rual chuan TMC, CPI leh NCP te chu poll body-in Election Symbols (Reservation and Allotment) Order 1968 hmangin national party nihna a chhuhsak ve thung a.
Symbols Act hmang hian inthlan hunah Returning Officers te chuan election symbol te chu a siamsak thin a, party te chuan India ramah single poll symbol an hmang ve thei lo.
NCP te hian Goa, Manipur leh Meghalaya-ah state party nihna an hloh bawk a, CPI chuan West Bengal leh Odisha ah an hloh bawk a, TMC te chu Arunachal Pradesh leh Manipur-ah state party atanga paih an ni bawk.
NCP leh Trinmool Congress te chu Nagaland leh Meghalaya ah te erawh tun hnaia assembly poll a an dinhmun tha avangin State party an la ni thung ang.
ECI chuan Rashtriya Lok Dal, Uttar Pradesh te, Bharat Rashtra Samithi, Andra Pradesh te, People’s Democratic Alliance, Manipur te, Pattali Makkal Katchi, Puducherry te, Revolutionary Socialist Party, West Bengal te leh Mizoram People’s Conference, Mizoram te chu state party an nihna a hnawlsak bawk.
Tipra Motha, Tripura, Lok Janshakti Party (Ram Vilas), Nagaland leh Voice of the People Party, Meghalaya te chu state political party-a pawm an ni thung.
Recognised political party te hi chuan duhsakna leh ngaih pawimawhna changin party symbol humhimsak te, state-run television leh radio ah free broadcast time te, inthlan huna biakrawn te bakah electoral rules leh regultions ah te rawn an ni thin a ni.
-- Advertisement --
Arvind Kejriwal an sawm
National party dinhmun an chelh hnuah AAP Chief Arvind Kejriwal chuan mipuite chu AAP zawma India number one nih tir tura ngenin mipuite chu party zawm nan 9871010101 miss call turin a ngen.
Kejriwal chuan, “Lung Inah an khung ang che u a. Lung Inah thla sarih atanga thla riat tang turin inpeih bawk ula. Chumi hnuah chuan engmah tihsual in neih loh avangin an chhuah zalen ang che u a. In hlau a nih chuan AAP chhuahsan rawh u,” tiin a sawi a.
“Tute pawhin pawisa emaw nihna emaw tawktarh in pawm a nih chuan party chhuahsan rawh u, in awmna tur ni lovah in awm a ni,” tiin a sawi bawk.
National party nih chu ‘mawhphurhna sang tak’ tia sawiin party thlawptu tinte hnenah lawmthu a sawi bawk a. “A tum khat nan India ramah positive politics kan pe a. Inthlan kan hmachhawn tawhna piangah politics of school, hospital a thleng zel a. Midangte pawhin politics of school leh education an sawi phah,” tiin a sawi bawk a.
AAP ideology bulthut pathum te chu rinawmna, ram hmangaihna leh humanity a ni tiin a sawi bawk a. “Hooliganism hi kan ideology a ni lo. Inthlan dik taka hmachhawnin a chak theih tih kan lantir tawh a. Sorkar dik leh rinawm takin a kaihhruai theih tih kan lantir tawh a. India number 1 a siam hi kan tum a ni a. Pathianin khawvela ram number 1 ah India min dahtir theih kan beisei a ni,” tiin a sawi bawk.