Dawr liante bungraw chahluh leh chhiah pek dan enfiah mek

Election Commission of India (ECI) chuan State Goods and Services Tax (SGST) khawihtu state Taxation department a phut angin, commissioner of State Tax Mizoram chuan Mizoram district hrang hranga Taxation office-te Mobile Squad din tur leh, a ranglama hma la turin thu a pe a. Hemi bawhzui hian Nilaini khan deputy commissioner of State Tax Serchhip Zone thawktute chuan Thenzawl khawchhunga dawr lian hrang hrangah mobile checking an nei.
Mobile checking hi asst. commissioner of State Tax Vanlalruata Ralte hoa neih a ni a. Serchhip khawchhungah pawh mobile checking hi neih mek a ni. Mobile checking-in a tum ber chu, kan hma lawka MLA inthlanpui awm tur denchhena political party-ten sumdawngte kaltlanga dawr bungraw hrang hrang inthlan campaign nana lo hman awm palh thei venna tur a ni. Physical checking an neih bakah hian Taxation department official-te chuan GST portal (GST network) atangin Serchhip district chhunga GST hnuaia dawr in register-te inthlan dawn hnaiha tam uchuak taka bungraw chah lut thar hluai leh chhiah pe tam thar hluai an awm em tih te, online-a an chhiah pekna leh bungraw lakna atangin an en bawk.
Heta an thil hmuhchhuah hi commissioner of State Tax Mizoram office-ah an report anga, a ni hian ECI hnenah report a pe leh dawn a ni.