Dawt sawi thupnan dawt dang sawiah Duhoma puh

Dawt sawi thupnan dawt
dang sawiah Duhoma puh
Tunhnaia BJP lam nena an inbiaa puhna thu leng meka mipui rilru lak pen tumin ZPM leader Lalduhoma chuan dawt dang a sawi leh tih Congress party chuan an sawi.
MPCC thuchhuak chuan, ZPM leader Pu Lalduhoma’n ZPM candidate tur Congress-in cheng nuai 100-in an thlem nia a sawi chu, Guwahati a zin chungchanga a dawt sawi Mizoram mipui rilru lak pen leh phatmar tuma talbuaiin dawt dang a sawi lehna mai a ni, tiin, ‘Dawt pakhat a sawi sawifiahna’n dawt dang tam tak a sawi chhoh zel a ngai tawh dawn tih hre lawk turin Mizoram mipui kan ngen a ni,’ a ti.
Thil chiang fak hre lo a nih thin avangin Pu Lalduhoma chu Assembly House-ah pawh a dawt sawi vanga ngaihdam dil ngai hial a nih thu te, cheng nuai 100 chungchang a hriat pawh hi Assembly speaker Pu Lalrinliana USA zinin MNF sawrkara cheng nuai 100 chungchang ziah bo awm a sawi nen khan a hriatpawlh leh tawh em ni tih chu an zawhna a ni tih a sawi.
BJP Minority Morcha National secretary Delson Notlia-in Airport-ah Lalduhoma chu a hmu ngei tih a sawi bakah ZPM leader hi hmaichhana tum khat an inbiak tawh bak inbiakna an la neih loh thu a sawi laiin, Pu Lalduhoma erawh chuan ZPM chhung inkhawmah Delson hi vawikhatmah a la hmuh loh thu sawiin WhatsApp-ah erawh an inbiak thu a sawi thung tih MPCC hian an sawi.
‘ZPM chhungkaw pa berin chhung inkhawmah Mizoram mipui mai ni lo, ama party puite hmaah ngei pawh dawt a sawi duh zel hian chhungkaw pa ber atana mi rintlak a nih lohzia Pu Lalduhoma hian a intifiah chiang hle a. MNF sawrkar hi NDA leh NEDA a an thawhpui BJP hian sawrkar leh tura an rin loh avangin an sum leh pai tha chakna hmanga Congress party do thei tur tualto party dang an zawng tih hi mipui rindan a ni a. He hun remchang hi lo lak tumin ZPM chhunga mi thenkhatten BJP a ruka an dawr chungchangah ZPM chhungkuaah nasa taka inpuhmawhna a awm hial a ni,’ thuchhuah hian a ti.