Debate-a incho kual velte hian Mizoram min tham lo – Vanlalhmuaka

SASCI sum chungchanga debate-a incho kual a, mipui rilru lak pen tum politician-te chuan Mizoram min tham lo hle nia a ngaih thu BJP Mizoram president Vanlalhmuaka chuan a sawi.
Thawhtannia an state office-a inkhawmah BJP Mizoram president chuan Mizoram chu Pathian thu duh tak ni si, nun pui leh si lo kan nih avangin kan state-ah development engmah tak tak kan hmu thei lo, tia sawiin, Prime minister Modi chuan mipui hmaa insawifiah emaw a thusawi tawh sawi pial turin thuthar thehdarhtute hmaah a inlan ngai loa, a chhan chu, manifesto angin India ram hmasawnna turin hna a thawh vang a ni a, a hnathawh rahchhuah zawk chu thuthar thehdarhtuten an puangzar mai thin tih a sawi.
“Keini state-ah erawh kan hruaitu lu berten insawifiah leh mipui hmaa an thusawi tawh sawipial dan zawngin an buai hle thin a, tuna SASCI sum chungchanga debate-a incho kual a, mipui rilru lak pen tum politician-te hian Mizoram hi min tham lo hle a, mipui lam lah kan harh thei si lo, a lungchhiatthlak hle a ni,” a ti.
Kan ram hruaituten dawt leh thu tak inchawhpawlh hmanga min kalpui reng chuan ramin hmasawnna a hmu thei dawn lo tih Vanlalhmuaka hian a sawi a. Ram hruaitu mi dik leh mi tak kan neih hunah kalphung dik, system dika kan kal hunah ram chuan hma a sawn mai dawn tih sawiin, “Vawiin thlenga Mizoramin CM tawng mai mai thin kan la neih chhunzawm zel hi a pawi hle a, kalphung ngai reng hnuaiah tawngkam thar hmanga mipui bum hi kan sim a ngai. Mipa taka ram hruai ngam, mahni sawrkar hun chhunga thil thleng a, a mawh la ngam politician kan mamawh a, mipui hnena zirtirna dik pe thin CM kan mamawh takzet a ni,” a ti.