Delhi-a bomb tipuaktu mikhualtu nia hriat man

Delhi-a bomb tipuaktu mikhualtu nia hriat man
National Investigation Agency (NIA) chuan November 10-a Delhi-a Red Fort tuala car bomb tihpuah an chhuina kal zelah mipa pakhat, Faridabad-a cheng, kum 32 mi an man belh leh.
An mi man hi Delhi-a car bomb tihpuaha chuang, Umar Un Nabi-a awmna tur lo siamsaka a kal vel dan tur lo buaipuitu niin an hriat a ni.
Chhuitute chuan Mohammad Soyab-a hi Faridabad-a Dhauj venga cheng niin Nabi-a kha bomb a tihpuah hma ni eng emaw zat a lo mikhual a, ‘a kal vel leh a kawng zawh tur a ngaihtuahpui’ niin an sawi a. He thubuai chhui meka man pasarihna a ni.
“Thawhlehni khan NIA team-in an man a, hnuchhuina thar hmuh belh zelah Soyab-a hian National Capital Region (NCR)-a beihpui an thlaknaah a pui niin a lang a, a lakah thubuai kan ziak lut tawh,” tiin NIA officer pakhatin a sawi.
Officer hian Soyab-a an man takah hian Nabi-a chet vel dana an la hriat loh thenkhat, Red Fort-a a lirthei a khalh luh hmaa a awm dan an hriat theih phah an beisei tih a sawi a. “Finfiahna kan neih chinah chuan him taka a tum a thlen theihna turin a pui a. A mikhual chhungin ruahmanna pawh a siampui niin kan hria,” a ti.
NIA hian a hmain bomb tipuaktu ber nia an hriat, Nabi-a nena inzawmna nei mi paruk an lo man tawh a, heng mite hi ruahmanna siamtu, kawng kawhhmuhtu leh awmna tur lo ngaihtuahsaktu nia hriat an ni hlawm. Chhuitute hian India ram pawnah pawh lo kaihruaitu pawl an awm an ring a, bomb tipuaktu hi sum leh pai leh thil dang hmangin, inthlunzawmna lian zawk neiten an pui thei bawk niin an hria.
Delhi-a bomb puak kha state eng emaw zatah chhui kai niin Delhi, Haryana, Uttar Pradesh leh Jammu & Kashmir thlenga dap niin digital device, inbiakna, kutziak lehkha pawimawh an hmuhte pawh chhuitute hian an endik vek.
NIA officer dang pakhat chuan kha thil thleng phiar chhuah dan kha a chhawng duat a ni thei tih a sawi a, a bulpui ber chhui chhuah ngei a ngai niin a sawi a. “Kil hrang hrang atangin, ramri piah lama an zawmpui leh a phena lo awm ve dang ni thei zawng zawng en a ni a, mi man belh pawh an awm zel a rinawm,” a ti.
India khawpui ber lun lai tak, ni tin mi sang telin an tlawh thin hmuna Hyundai i20 car-a bomb phurh tihpuahah hian a tirah mi 10 an thi a, tun hnai kum eng emaw zat chhunga khawpui bera beihna thleng lian ber pakhat a tling.