Delhi-a pur chaw tura kal ngam sawrkar hotu an awm mang lo – Lal Thanzara

Delhi-a pur chaw tura kal ngam
sawrkar hotu an awm mang lo
– Lal Thanzara
MLA inthlan dawna ZPM party an puihna avanga an phut let an tihhlawhtlin sak loh vang nge, ZPM sawrkar hotute zingah Delhi-a pur chaw tura kal ngam an awm mang lo niin Congress president Lal Thanzara chuan a sawi.
Ningania Serchhip district Lungpho khua a tlawhnaah MPCC president chuan, ZPM sawrkar hotute zingah Delhi-a pur chaw tura kal ngam an awm mang lo chu vanduaithlak a tih thu a sawi a. MLA inthlan hnuhnung bera BJP-in ZPM candidate-te sum leh paia an puih avangin he sawrkarah hian phut let an nei lian nia an hriat thu a sawi.
“BJP MLA pahnih hi minister-a dah turin thu pawh an rawn niin sawi a awm a. Chutiang a nih loh chuan a puitute ngei hian ZPM sawrkar hi an hrek mek niin kan hria. He sawrkarah hian mipui tan beisei san tur a awm lo,” a ti.
BJP sawrkarna state-ah Kristiante an chep nasa a, tunhnai maiah pawh Assam chhunga hmun pakhatah Kristian sakhaw hruaituten rawngbawlna pawimawh an neihah banner pawh an tar ngam lo niin Lal Thanzara hian a sawi.
“Hetiang khawpa Kristian-ten kan tawrh tawh lai a, MNF leh ZPM ten BJP an thawhpui tlat ngaimawh nachang kan hre lo hi a mak a, ringtute kan harh a hun hle,” a ti.
MPCC president chuan khaw hrang hrang a fankualnaah mipuiin Congress sawrkar leh hun an nghahhlelh thu an sawi nasa, tiin, Mizoram hmun hrang hrangah MLA pakhat chauh nei Congress party zawm thar an awm zel tih a sawi.