Delhi-a zirlaite hmaah thu sawi

Larsap Gen. Vijay Kumar Singh (Retd) chuan Nilaini khan Indian Institute of Public Administration New Delhi tlawhin, Advanced Professional Programme in Public Administration (APPPA) course training mek officer-te hmaah thu a sawi.
Larsap chuan ram venhim kawngah awmze nei taka tanrual a pawimawh tih sawiin, ram himna tichhe theite sawrkar anga hmachhawn turin a mal maia kal loa, ngaihtuahna thar leh thawhhona tha zawk hmanga hmachhawn a tul tih a sawi. Ram tan a nih dawn phawt chuan sawrkar laipui hnuaia ministry atanga district administration thlengin lungrual leh inpawh tlang taka hma lak a ngai tih a sawi bawk.
PM Gati Shakti pawimawh zia sawiin, ministry hrang hrang, state leh local body-te inkara thawhhona felfai tak avangin hmasawnna ruhrel a taka hmuh theihin a awm tih a sawi a. Hei hian sawrkar policy leh hmanraw neihte tha taka kalkawp tirin rah chhuah duhawm tak bakah tul loa sum leh pai deh ral mai mai tur a veng tih a sawi a ni.
Ram hmasawnna atan hmalakna huapzo, kan zavaia telna leh tanhona kalpui a pawimawh tih larsap hian sawiin, “Ram ralmuang leh zalen siam turin inrintawnna, mawhphurhna intawm leh tanhona neih a tul,” a ti.